काठमाडौँ: नेपाली सेनाका पूर्व उपरथी बाबुराम श्रेष्ठले प्रतिनिधिसभा सदस्य निर्वाचनमा गोरखा क्षेत्र नम्बर–२ बाट स्वतन्त्र उम्मेदवारी दिने घोषणा गरेका छन्।
सिरान्चोक गाउँपालिका–८, जौबारीका स्थायी बासिन्दा श्रेष्ठले सामाजिक सञ्जालमार्फत फागुन २१ गते हुने निर्वाचनमा उम्मेदवारी दिने घोषणा गरेका हुन्।
उम्मेदवारी घोषणा गर्दै उनले जेन–जी आन्दोलनको ऊर्जा र शहीदहरूको बलिदानलाई आत्मसात् गर्दै नयाँ सोच र विकासको स्पष्ट खाकासहित बाँकी जीवन गोरखाको समृद्धिका लागि समर्पण गर्ने प्रतिबद्धता व्यक्त गरेका छन्। उनले विधि र प्रक्रिया अनुसार आवश्यक सबै कामहरू क्रमिक रूपमा अघि बढाउने जनाउँदै सबैको सहयोगको याचना समेत गरेका छन्।
पूर्व उपरथी श्रेष्ठ सिभिल इन्जिनियरिङ पृष्ठभूमिसहित नेपाली सेनामा लामो समय सेवा गरेका व्यक्ति हुन्। उनले सिभिल इन्जिनियरिङको ज्ञान र सेनाबाट सिकेको अनुशासनलाई जन्मभूमिको सेवामा प्रयोग गर्ने उल्लेख गर्दै आर्थिक तथा सामाजिक रूपान्तरणको लक्ष्यसहित गोरखा–२ बाट स्वतन्त्र उम्मेदवारी दिने घोषणा गरेका छन्।
