काठमाडौं । गाईजात्रा ‘राष्ट्रिय चिडिया एयरबस’ सार्वजनिक भएको छ । हास्न नजान्नेहरू पनि पेट मिच्न बाध्य हुने र देशलाई माया गर्नेहरूलाई त अनिवार्य हेर्नै पर्ने गाईजात्रा ‘राष्ट्रिय चिडिया एयरबस’ सार्वजनिक भएको हो ।

हास्य कलाकारद्वय दमन रुपाखेती र उत्तम कोदेको संयुक्त परिश्रमले जन्माएको यो गाईजात्रा विशेष व्यंग्य अब युट्युबमा सार्वजनिक भइसकेको छ । यो भिडियो सिर्जना होइन, राष्ट्रिय स्तरको व्यंग्य उडान हो, जसले नेतादेखि जनतासम्म, लुतोपूजादेखि संसद छेउसम्म सबैलाई एकै फ्लाइटमा उडाएको छ ।

निर्देशक दमन भन्छन्, ‘हामी हाँस्न पनि बिर्सियौं, अनि रिसाउन पनि थाक्यौँ, अब त व्यंग्यकै सहारामा चेतना जगाउने बेला भयो, यो भिडियो हाँसो मात्रै होइन, सन्देश, सचेतना र आशाको मिश्रण हो ।’

देशको हालको जटिल अवस्थाबाट भिडियो सुरु हुन्छ । यसमा नेताहरूको कर्तुत, जनताको प्रवृत्ति, अनि सुधारको झिनो आशा सबै मिसिएको छ । तर यसमा टन्न हाँसो छ । सन्देश छ । अनि छ देशको यो दर्दमा बनेको हास्योपचार ।

‘राष्ट्रिय चिडिया एयरबस’ नाममात्रको कथा होइन, यसभित्र ‘राष्ट्रिय लुते पूजा’, ‘संसद छेउ’, ‘नेताको संकल्प’ जस्ता छोटा व्यंग्य पनि छन्, जसले यथार्थलाई हास्य रसमा चोपेर खाउँ खाउँ लाग्ने बनाएकफ छ ।

यस गाईजात्रामा कलाकार दमन रुपाखेती, उत्तक अर्याल ‘कोदे’, मिनु कुमाइ, दिलिप ढकाल, बल बहादुर घतानी, सुप्रिया हमाल, समिता रिजाल र दीपक रायमाझी लगायतको अभिनय रहेको छ ।