काठमाडौँ । काठमाडौँको नागार्जुन नगरपालिका वडा नं. ५ हरिसिद्धि, सितापाइलामा ‘कृषि सांस्कृतिक तथा व्यापार महोत्सव’ भव्य रूपमा सुरु भएको छ ।

राष्ट्रिय लोक सांस्कृतिक प्रतिष्ठान नेपालको आयोजनामा सञ्चालित उक्त महोत्सवको शुक्रबार एक विशेष समारोहका बिच उद्घाटन गरिएको हो। महोत्सवको उद्घाटन नागार्जुन नगरपालिकाका प्रवक्ता एवं वडा नं. ५ का वडाध्यक्ष महेश रिमालले गरे ।

उद्घाटन मन्तव्य राख्दै रिमालले स्थानीय कृषि उत्पादनको प्रवर्द्धन, आन्तरिक व्यापारको विस्तार र लोक संस्कृतिको जगेर्ना गर्न यस्ता महोत्सवहरूले महत्त्वपूर्ण भूमिका खेल्ने बताए। उद्घाटन कार्यक्रम राष्ट्रिय लोक सांस्कृतिक प्रतिष्ठान नेपालका अध्यक्ष नमराज ढुंगानाको अध्यक्षतामा सम्पन्न भएको थियो।

साउन ४ गतेसम्म चल्ने महोत्सवका मुख्य आकर्षणको रुपमा महोत्सव स्थलमा विभिन्न रैथाने तथा आधुनिक कृषि उत्पादन, औद्योगिक सामग्री, विविध स्वादका खानेकुरा (फूड स्टल) का साथै बालबालिका र युवाहरूका लागि पिङ तथा विभिन्न मनोरन्जनात्मक खेलका स्टलहरू राखिएका छन्।

महोत्सवको अवधिभर नेपालका ख्यातीप्राप्त राष्ट्रिय तथा स्थानीय कलाकारहरूको विशेष सांगीतिक प्रस्तुति रहने आयोजकले जनाएको छ । महोत्सवमा रचना रिमाल, समिक्षा अधिकारी, एलिना चौहान, पशुपति शर्मा, नवराज घोरासिनी, भोजराज काफ्ले, सरोज लामिछाने, भिमसेन खतिवडा, सृजना खत्री (हाउडेमाया), सहिमा श्रेष्ठ र विन्दु परियार लगायतका लोकप्रिय कलाकारहरूले आफ्नो प्रस्तुतिमार्फत दर्शकहरूलाई मनोरञ्जन गराउने छन्।

स्थानीय व्यापार व्यवसायलाई चलायमान बनाउन र सर्वसाधारणलाई सांस्कृतिक मनोरञ्जन प्रदान गर्न आयोजित यो महोत्सव आगामी साउन ४ गतेसम्म निरन्तर चल्नेछ।