काठमाडौं । इलामको चुलाचुली गाउँपालिकामा कार्यरत इन्जिनियर डिल्लीराज खड्का ६ लाख रुपैयाँ घुससहित पक्राउ परेका छन्।

अख्तियार दुरुपयोग अनुसन्धान आयोगका अनुसार पुलको रिडिजाइन स्वीकृत गराइदिने तथा ठेक्काको भुक्तानी प्रक्रिया सहजीकरण गरिदिने भन्दै सेवाग्राहीसँग घुस मागेको उजुरीका आधारमा उनलाई पक्राउ गरिएको हो।

अख्तियारका प्रवक्ता सुरेश न्यौपानेका अनुसार आयोगको टोलीले बुधबार झापाको दमक नगरपालिका–१ स्थित एक खाजाघरबाट खड्कालाई सेवाग्राहीबाट लिएको ६ लाख रुपैयाँसहित रंगेहात पक्राउ गरेको हो।

आयोगले इन्जिनियर खड्काले पुलको रिडिजाइन स्वीकृत गराइदिने र ठेक्काको भुक्तानी प्रक्रियामा सहजीकरण गरिदिने नाममा सेवाग्राहीलाई दुःख तथा हैरानी दिँदै घुस/रिसवत मागेको जनाएको छ।

पक्राउ परेका खड्कामाथि थप अनुसन्धान भइरहेको अख्तियार दुरुपयोग अनुसन्धान आयोगले जनाएको छ।