काठमाडौँ, बुधबार सिंहदरबारस्थित सञ्चार मन्त्रालयको हलमा लोकसञ्चारकर्मी र अनलाइन टिभी पत्रकारसँग भएको संयुक्त छलफलमा मन्त्री खरेलले सामाजिक सञ्जाल र अनलाइन मिडियालाई नयाँ मूलधारको मिडियाको रूपमा सरकारले स्वीकार गरेको बताए। उनले सामाजिक सञ्जाल कहिल्यै बन्द नहुने र बन्द गरिने छैन भन्ने कुरा स्पष्ट पारेका छन्।

मन्त्री खरेलले भने, “सामाजिक सञ्जाललाई व्यवस्थित र जिम्मेवार बनाउनु जरुरी छ, तर बन्द गर्ने कुरा कसैलाई स्वीकार्य छैन। सामाजिक सञ्जाललाई व्यवस्थित गर्नुपर्छ, जिम्मेवार बनाउनुपर्छ। सरकार जनताको आवाज सुन्ने, देखिने र महसुस हुने हुनुपर्छ। त्यसकारण सञ्चार मन्त्रालय पनि सुनिन्छ, देखिन्छ र महसुस हुन्छ।”

मन्त्री खरेलले अनलाइन मिडिया दर्ता लगायतका प्रक्रियागत झन्झट हटाउन मन्त्रिपरिषद्मार्फत निर्णय गराउने तर्फ पहल गरिरहेको बताए। छलफलमा लोकसञ्चारकर्मी नेपालका अध्यक्ष चन्द्रमणि गौतम र अनलाइन टिभी पत्रकार संघका अध्यक्ष जीवन भण्डारीले मन्त्रीको ध्यानाकर्षण गराएका थिए। छलफलपछि दुबै संघले मन्त्री खरेललाई ध्यानाकर्षण पत्र बुझाएका छन् र मन्त्री खरेलले त्यसलाई अध्ययन गरी सञ्चारकर्मीको हितमा समन्वयमै काम गर्ने प्रतिबद्धता व्यक्त गरे।