क्लोथ एण्ड फूड बैंक नेपाल र टोखा नगरपालिकाको सहकार्यमा टोखा नगरपालिका वडा नं. ९ को प्राङ्गणमा कपडा बैंक एक विशेष समारोहका बीच सञ्चालनमा आएको छ । सामाजिक उत्तरदायित्व अन्तर्गत समुदायमा प्रत्यक्ष लाभ पु–याउने उद्देश्यसहित सुरु गरिएको यो कार्यक्रम नगरवासीहरूका लागि अत्यन्तै उपयोगी पहलका रूपमा प्रस्तुत गरिएको थियो।

संकलन बक्समार्फत प्रयोगमा नआएका लुगा, झोला, टोपी, मोजा, बेल्ट र पुस्तकहरू संकलन गरिनेछ। संकलित सामग्री बुटवलस्थित कारखानामा रिसाइकल गरी प्याकेजिङ गरी विपन्न वर्गलाई निःशुल्क वितरण गरिनेछ।

कार्यक्रमका प्रमुख अतिथि टोखा नगरपालिकाका नगरप्रमुख प्रकाश अधिकारीको उपस्थितिमा उद्घाटन गरिएको उक्त कपडा बैंकमार्फत आवश्यक तर आर्थिक पहुँच कम भएका नागरिकहरूले प्रयोगयोग्य कपडा सहजै प्राप्त गर्न सक्ने व्यवस्था गरिएको छ। कार्यक्रममा वरिष्ठ समाजसेवी एवं ग्रीनसिटी हस्पिटलका अध्यक्ष लोकबहादुर टण्डन, प्रहरी प्रभाग नयाँ बस पार्कका इन्चार्ज शंकर श्रेष्ठ, सामुदायिक सेवा केन्द्र तथा सामुदायिक प्रहरी सेवा केन्द्र गोंगवु नयां बसपार्ककी अध्यक्ष मीना शिवाकोटी, क्लोथ एण्ड फूड बैंक नेपालका अध्यक्ष कमल जिसी, नगरपालिकाका विभिन्न जनप्रतिनिधि, पत्रकार, स्थानीयवासी तथा सरोकारवालाहरूको सक्रिय उपस्थितिले कार्यक्रम निकै उत्साहजनक देखिएको थियो।

कार्यक्रमको अध्यक्षता भने टोखा नगरपालिका वडा नम्बर ९ का वडाध्यक्ष रामभक्त घिमिरेले गरेका थिए भने उक्त कार्यक्रको सञ्चालन संगम महतले गरेका थिए।

Cloth & Food Bank Nepal का अध्यक्ष कमल जिसीका अनुसार हालसम्म 200 स्थानीय तहसँग सहकार्यमा परियोजना सञ्चालन गरिएको छ। निकट भविष्यमै खाद्यान्न बैंक पनि सुरु गर्ने तयारी भइरहेको उनले जानकारी दिए। कपडा बैंकको नारामा भनिएको छ, “Recycling Clothes – Restoring Lives – Live Life Cleaner, Make Earth Greener”। साथै, “Help the People” भन्ने मूल सन्देश अभियानको केन्द्रमा छ।

दान गर्न चाहनेहरूका लागि बक्स , वडा नं ९ को प्राङ्गणसंगै सामुदायिक प्रहरी सेवा केन्द्रमा राखिएको छ। साथै, कपडा आवश्यक पर्ने जो–कोहीले शो–रुममा गई निःशुल्क सामग्री लिन सक्ने व्यवस्था मिलाइएको छ।

तस्बिरहरु हेर्नुहोस्: