गोरखा — नेपाली कांग्रेस जिल्ला कार्यसमिति गोरखाका पूर्व पार्टी सभापति हरि घलेसँग नेपाली कांग्रेस गोरखा क्षेत्र नं. २ का प्रतिनिधि सभाका उम्मेदवार प्रकाशचन्द्र दवाडीले आज बारपाकमा शिष्टाचार भेटघाट गर्नुभएको छ।

भेटका क्रममा घलेले दवाडीलाई आगामी निर्वाचनमा विजयी हुने शुभकामना व्यक्त गर्नुभयो। उहाँले गगन थापा प्रधानमन्त्री बन्ने र दवाडी मन्त्री बन्ने विश्वास व्यक्त गर्दै आशीर्वाद प्रदान गर्नुभएको थियो।

सो अवसरमा घलेले केही दिनअघि विभिन्न राजनीतिक दलहरूले सामाजिक सञ्जालमार्फत फैलाएको गलत प्रचारप्रति गम्भीर ध्यानाकर्षण भएको बताउनुभयो। आफू दुई कार्यकालसम्म कांग्रेसको जिल्ला पार्टी सभापतिका रूपमा जिम्मेवारी सम्हालेको स्मरण गर्दै उहाँले हाल स्वास्थ्य समस्याका कारण बेड रेस्टमा रहेको जानकारी दिनुभयो।

नियमित औषधि सेवन गर्नुपर्ने अवस्था रहेकाले प्रत्यक्ष चुनावी प्रचारप्रसारमा सहभागी हुन नसकेको उहाँको भनाइ थियो। यद्यपि, घरमै बसेर भए पनि कांग्रेसका दुवै क्षेत्रका उम्मेदवारहरूको पक्षमा मत माग्ने र विजयी गराएर मन्त्री बनाउने अभियानमा निरन्तर साथ रहने प्रतिबद्धता उहाँले व्यक्त गर्नुभयो।