काठमाडौ: सर्वसाधारणलाई स्वास्थ्य सेवामा सहज पहुँच विस्तार गर्ने उद्देश्यले कान्तिपुर डेन्टल कलेज शिक्षण अस्पताल तथा अनुसन्धान केन्द्रमा निःशुल्क स्वास्थ्य शिविर तथा समझदारी पत्र (MOU) हस्ताक्षर कार्यक्रम सम्पन्न भएको छ।

बसुन्धरास्थित केडीसी जनरल हस्पिटल प्राङ्गणमा आयोजित उक्त कार्यक्रम केडीसी जनरल हस्पिटल र नेपाल मगर महिला संघ, जिल्ला समिति काठमाडौको सहकार्यमा “स्वास्थ्य र पहुँचमा हाम्रो साझा प्रतिबद्धता” भन्ने नारासहित सञ्चालन गरिएको हो। कार्यक्रमअन्तर्गत स्थानीय सर्वसाधारणलाई निःशुल्क दन्त परीक्षण, फिजियोथेरापी परामर्श तथा आँखा जाँच सेवा प्रदान गरिएको थियो।  कार्यक्रममा दुवै पक्षका व्यक्तिहरुको उल्लेख्य संख्यामा सहभागिता रहेको थियो।

सोही अवसरमा स्वास्थ्य सेवामा सहकार्य विस्तार गर्ने उद्देश्यले दुवै पक्षबीच समझदारी पत्र (MOU) मा हस्ताक्षरसमेत गरिएको छ। सम्झौता पत्रअनुसार केडीसी जनरल हस्पिटललाई नेपाल मगर महिला संघ, जिल्ला समिति काठमाडौको आधिकारिक स्वास्थ्य साझेदारका रूपमा मान्यता प्रदान गरिएको छ। यससँगै संघसँग आबद्ध सदस्यहरूले अस्पतालबाट विभिन्न सेवामा सहुलियत प्राप्त गर्नेछन्। जसअन्तर्गत आइपीडी सेवामा २५ प्रतिशत र डेन्टल सेवामा ७ प्रतिशत छुट प्रदान गरिने उल्लेख गरिएको छ। सम्झौता पत्रमा नेपाल मगर महिला संघ, जिल्ला समिति काठमाडौका अध्यक्ष मन्जु थापा र कान्तिपुर डेन्टल कलेज शिक्षण अस्पताल तथा अनुसन्धान केन्द्र (केडीसी जनरल हस्पिटल) का कार्यकारी अधिकृत (COO) हिमाल रानाले हस्ताक्षर गरेका छन्।

कार्यक्रममा बोल्दै नेपाल मगर महिला संघ, जिल्ला समिति काठमाडौका अध्यक्ष मन्जु थापाले यस सहकार्यले महिला तथा समुदायस्तरका सदस्यहरूलाई गुणस्तरीय स्वास्थ्य सेवामा पहुँच बढाउने विश्वास व्यक्त गरिन् । “हामीले समुदायका महिलाहरूलाई लक्षित गरेर स्वास्थ्य सचेतना र सेवा पहुँच विस्तार गर्न यस्तो सहकार्यलाई प्राथमिकता दिएका छौँ,” उनले बताइन् ।

त्यसैगरी, केडीसी जनरल हस्पिटलका कार्यकारी अधिकृत (COO) हिमाल रानाले संस्थागत सहकार्यमार्फत सामाजिक उत्तरदायित्व पूरा गर्ने लक्ष्य रहेको उल्लेख गरे। “स्वास्थ्य सेवा सबैको पहुँचमा पुर्‍याउने हाम्रो प्रतिबद्धता हो। यस सहकार्यले विशेषगरी लक्षित समुदायलाई सहुलियतसहित सेवा प्रदान गर्न सहयोग पुग्नेछ,” उनले भने। आयोजकले यस्ता कार्यक्रमहरूले समुदायस्तरमा स्वास्थ्य सेवाको पहुँच विस्तार गर्न महत्वपूर्ण भूमिका खेल्ने विश्वास व्यक्त गरेका छन्।