गोरखा । गण्डकी प्रदेशका वन तथा वातावरण मन्त्री नम्डु गुरुङ ले डिभिजनल वन कार्यालय गोरखाको अनुगमन तथा निरीक्षण गरेका छन् । बुधबार गरिएको अनुगमनका क्रममा मन्त्री गुरुङले कार्यालयले सम्पादन गर्दै आएका विभिन्न कार्यक्रमहरूको स्थलगत अवलोकन तथा मूल्यांकन गरेका थिए ।

डिभिजन वन कार्यालय गोरखाका प्रमुख मदन मोहन शाण्डिल्यका अनुसार मन्त्री गुरुङले चालु कार्यक्रमहरूको प्रगति तथा कार्यान्वयन अवस्थाबारे जानकारी लिएका थिए ।

अनुगमनका क्रममा मन्त्री गुरुङले गोरखा नगरपालिका–९ शिखरस्थित लक्ष्मी महिला सामुदायिक वनले सञ्चालन गरेको सिताके च्याउ खेतीको निरीक्षण गरेका थिए ।

त्यसैगरी, सहिदलखन गाउँपालिकास्थित रामलक्ष्मण सामुदायिक वनमा मिचाहा प्रजाति नियन्त्रण तथा वनमा रहेका प्रज्वलनशील पदार्थबाट मल उत्पादन गर्ने कार्यक्रमको पनि अनुगमन गरिएको उनले जानकारी दिए ।

वनमन्त्री गुरुङले विभिन्न स्थानमा सञ्चालन भइरहेका सोलार फेन्सिङ (Solar Fencing) सम्बन्धी कार्यक्रमहरूको समेत स्थलगत अनुगमन गरेका थिए । अनुगमनका क्रममा उनले वन संरक्षण तथा व्यवस्थापनलाई थप प्रभावकारी बनाउन आवश्यक सुझाव समेत दिएका डिभिजन वन कार्यालय गोरखाले जनाएको छ ।