काठमाडौं । राष्ट्रिय संगीतकर्मी संघ, जिल्ला शाखा पर्वतको तेस्रो अधिवेशन सम्पन्न भएको छ । अधिवेशनले गायक तथा सर्जक भिम बहादुर पौडेलको अध्यक्षतामा नयाँ कार्यसमिति गठन गरेको छ ।

अधिवेशनमा रमेश सेञ्चुरीको अध्यक्षता रहेको थियो भने राष्ट्रिय संगीतकर्मी संघ, केन्द्रिय समितिका अध्यक्ष प्रकाश कटुवाल प्रमुख अतिथिका रूपमा उपस्थित थिए ।

त्यसैगरी कार्यक्रममा संघका केन्द्रिय उपाध्यक्ष जिवन परियार, बागमती प्रदेश अध्यक्ष दावा फिन्जो तामाङ, निर्वाचन संयोजक शंकर ढकाल लगायत कलाकार तथा पत्रकारहरूको विशेष उपस्थिति रहेको थियो । कार्यक्रमको सञ्चालन पर्वते गायक तथा संगीतकार सुजन बराईलीले गरेका थिए ।

नवनिर्वाचित अध्यक्ष भिम बहादुर पौडेलले धन्यवाद ज्ञापन गर्दै संघलाई आगामी दिनमा चुस्त–दुरुस्त रूपमा अघि बढाउने प्रतिबद्धता व्यक्त गरेका छन् । उनले लोकसंगीत तथा मौलिक कला–संस्कृतिको संरक्षण र प्रवर्द्धनलाई प्राथमिकतामा राखिने बताए ।

उनका अनुसार केही हप्ताभित्र नवगठित कार्यसमितिको पहिलो बैठक बसेर आगामी योजनाबारे विस्तृत छलफल गरिनेछ ।