काठमाडौं — नेपाल उद्योग वाणिज्य संघ काठमाडौंको उपाध्यक्षमा उज्वलजंग पराक्रम शाह निर्वाचित भएका छन्। शनिबार सम्पन्न संघको पाँचौँ वार्षिक साधारण सभा तथा तेस्रो अधिवेशनबाट शाह उपाध्यक्ष पदमा निर्विरोध निर्वाचित भएका हुन्।

अधिवेशनबाट शाहसँगै दुर्गाराज श्रेष्ठ र राजेन्द्र शेरचन पनि निर्विरोध निर्वाचित भएका छन्। यसैगरी संघको अध्यक्षमा रमानाथ श्रेष्ठ निर्विरोध चयन भएका छन्।

उपाध्यक्षमा निर्वाचित भएपछि शाहले साना तथा मझौला व्यवसायीका हकहितका लागि प्रभावकारी रूपमा आवाज उठाउने प्रतिबद्धता व्यक्त गरेका छन्। उनले कर, प्रशासनिक झन्झट, लगानी असुरक्षा तथा बजार व्यवस्थापनका समस्यालाई सम्बन्धित निकायसम्म पुर्‍याउने आफ्नो प्राथमिकता रहने बताए।

“काठमाडौं जिल्लाभित्रका साना तथा मझौला व्यवसायी विभिन्न चुनौतीसँग संघर्ष गरिरहेका छन्। उनीहरूको आवाजलाई संघमार्फत प्रभावकारी रूपमा उठाउने मेरो पहिलो प्राथमिकता हुनेछ,” शाहले भने।

उनले निजी क्षेत्र र सरकारबीच विश्वासको वातावरण निर्माण आवश्यक रहेको उल्लेख गर्दै व्यवसायीलाई अर्थतन्त्रका साझेदारका रूपमा हेर्नुपर्ने धारणा राखे। नयाँ नेतृत्व चयनसँगै संघले काठमाडौंका व्यवसायीका समस्या समाधान तथा आर्थिक गतिविधि सुदृढीकरणमा सक्रिय भूमिका खेल्ने अपेक्षा गरिएको छ।