पोखरा: पोखरा लोकदोहोरी रेस्टुरेन्ट व्यवसायी संघ कास्की को अध्यक्षमा पुनः जीवन गुरुङ निर्वाचित भएका छन् ।

पोखरामा आइतबार सम्पन्न संघको चौथो अधिवेशनबाट दुई वर्षे कार्यकालका लागि जीवन गुरुङको नेतृत्वमा नयाँ कार्यसमिति सर्वसम्मत रूपमा चयन गरिएको हो । गुरुङ यसअघि पनि संघको नेतृत्व सम्हालिसकेका थिए ।

नवनिर्वाचित कार्यसमितिको उपाध्यक्षमा विष्णु गुरुङ चयन भएका छन् । सचिवमा दिलु लामा मोक्तान पुनः दोहोरिएकी छन् भने सह–सचिवमा बबिता कार्की र कोषाध्यक्षमा भोजबहादुर गुरुङ निर्वाचित भएका छन् ।

त्यसैगरी सदस्यहरूमा प्रकाश गुरुङ, मन बहादुर गुरुङ तथा अमिर शर्मा चयन भएका छन् । ११ सदस्यीय कार्यसमितिमा बाँकी ३ सदस्य भने पछि मनोनित गरिने जनाइएको छ ।

नवनिर्वाचित अध्यक्ष जीवन गुरुङले पोखरा क्षेत्रका लोकदोहोरी रेस्टुरेन्ट व्यवसायी तथा कलाकारहरूको हकहितका लागि निरन्तर काम गर्ने प्रतिबद्धता व्यक्त गरेका छन् । उनले संस्थालाई थप सकारात्मक र प्रभावकारी ढंगले अगाडि बढाउने बताएका छन् ।

कोभिड महामारी र आर्थिक मन्दीपछि सुस्ताएको रात्रिकालीन दोहोरी व्यवसायलाई पुनः चलायमान बनाउन तथा नेपाली लोक संस्कृतिको संरक्षणमा नयाँ नेतृत्वले महत्वपूर्ण भूमिका खेल्ने अपेक्षा व्यवसायीहरूले गरेका छन् ।