भिमसेनथापा गाउँपालिकाले सार्वजनिक स्थानमा जथाभावी नकुहिने फोहोर फाल्ने कार्यलाई नियन्त्रण गर्न कडा व्यवस्था लागू गरेको छ। गाउँपालिकाले सूचना जारी गर्दै तोकिएको संकलन केन्द्रबाहेक अन्य स्थानमा नकुहिने फोहोर फालेको पाइएमा चार हजार रुपैयाँ जरिवाना गरिने जनाएको छ।

मंगलबारदेखि लागू भएको व्यवस्था अनुसार सडक, सार्वजनिक स्थल तथा तोकिएको संकलन केन्द्रबाहिर नकुहिने फोहोर विसर्जन गर्नेलाई कारबाही गरिनेछ। गाउँपालिकाले पालिकाभित्र नकुहिने फोहोर संकलन तथा व्यवस्थापन कार्यक्रम सञ्चालन गर्दै मासिक रूपमा फोहोर संकलन गर्ने दिन, समय र रुटसमेत निर्धारण गरेको छ।

गाउँपालिकाले धातु, प्लास्टिक, रबर तथा कागजजस्ता संवेदनशील फोहोर र काँच, सिसा, टिन, किलाकाँटी, ब्लेड तथा अन्य धारिला वस्तुजस्ता अतिसंवेदनशील फोहोरलाई छुट्टाछुट्टै वर्गीकरण गरी सरसफाइ गाडीमा बुझाउन नागरिकलाई आग्रह गरेको छ।

नकुहिने फोहोरको अव्यवस्थित व्यवस्थापनले माटोको उर्वराशक्ति घट्ने, पानीका स्रोत प्रदूषित हुने तथा फोहोर जलाउँदा वातावरण, मानव स्वास्थ्य र पशुपक्षीमा नकारात्मक असर पर्ने भएकाले वातावरण संरक्षण र स्वच्छ गाउँपालिका निर्माणका लागि यो अभियान सञ्चालन गरिएको गाउँपालिकाले जनाएको छ।