१२ चैत, काठमाडौं । प्रधानमन्त्री सुशीला कार्कीले वर्तमान निर्वाचन प्रणालीअनुसार कुनै एक दलको बहुमत आउँदैन भन्ने धारणा गलत सावित भएको बताएकी छन्।

बिहीबार साँझ राष्ट्रका नाममा सम्बोधन गर्दै उनले संविधानअनुसारको निर्वाचन प्रणालीले बहुमत असम्भव भन्ने भाष्यलाई खण्डन गरेको उल्लेख गरिन्। ‘यो संविधानमा भएको निर्वाचन प्रणालीले कुनै दलले बहुमत प्राप्त गर्न सक्दैन भन्ने भाष्यलाई समेत गलत सावित गरिदिएको छ,’ उनले भनिन्।

प्रधानमन्त्री कार्कीले नवनिर्वाचित प्रतिनिधिसभा सदस्यहरूलाई बधाइ दिँदै सफल कार्यकालको शुभकामना व्यक्त गरेकी छन्।

उनले युवाको नेतृत्वमा बन्न लागेको नयाँ सरकारले जेनजी आन्दोलनका माग तथा आकांक्षाअनुसार सुशासन, रोजगारी सिर्जना, भ्रष्टाचार नियन्त्रण, आर्थिक विकास र सामाजिक न्यायका क्षेत्रमा परिणाममुखी काम गर्ने विश्वास व्यक्त गरिन्।