ललितपुर । ललितपुर महानगरपालिकाले बिहीबारदेखि ‘वातावरण भ्यान’ सेवा सुरु गरेको छ। महानगरका मेयर चिरीबाबु महर्जनले उक्त भ्यानको शुभारम्भ गरेका हुन्।

वातावरण संरक्षण तथा सरसफाइ व्यवस्थापनलाई प्रभावकारी बनाउने उद्देश्यले सञ्चालनमा ल्याइएको यस भ्यानमार्फत महानगर क्षेत्रमा अनुगमन र कारबाहीलाई थप सशक्त बनाइने बताइएको छ।

अभियानमा वातावरण प्रहरीले महत्वपूर्ण भूमिका निर्वाह गर्नेछन्। उनीहरूले खुला रूपमा बालिएका आगो निभाउने, प्लास्टिकजन्य वस्तु जलाउन रोक्ने तथा अत्यधिक धुवाँ फाल्ने सवारीसाधन र उद्योगहरूको अनुगमन गर्नेछन्।

यसका साथै, जथाभावी फोहोर फाल्ने, ध्वनि प्रदूषण गर्ने, अव्यवस्थित रूपमा विज्ञापन टाँस्ने तथा रुखबिरुवामा क्षति पुर्‍याउने कार्यमा कडाइका साथ कारबाही गरिनेछ।

महानगरपालिकाको यस पहलले स्वच्छ, हरित र व्यवस्थित ललितपुर निर्माणमा महत्वपूर्ण योगदान पुर्‍याउने नगर प्रहरी प्रमुख सिताराम हाछेथुले जानकारी दिएका छन्।