गोरखा — पालुङटार नगरपालिकाले शिक्षक तथा विद्यालयका कर्मचारीलाई आफ्ना छोराछोरी सामुदायिक विद्यालयमै अध्ययन गराउन अनुरोध गरेको छ।

नगर कार्यपालिकाको कार्यालय अन्तर्गत शिक्षा, युवा तथा खेलकुद शाखाले जारी गरेको सूचनाअनुसार नगर शिक्षा समितिको निर्णयपछि यस्तो अनुरोध गरिएको हो। चैत १८ गते बसेको नगर शिक्षा समितिको बैठकले नगरभित्रका सबै सामुदायिक विद्यालयका शिक्षक तथा कर्मचारीहरूले आफ्ना छोराछोरी सामुदायिक विद्यालयमै भर्ना गरी अध्ययन गराउनुपर्ने अनुरोध गरेको हो।

नगरपालिकाका अनुसार यस कदमले सामुदायिक विद्यालयको शैक्षिक गुणस्तर सुधार गर्न र शिक्षक तथा कर्मचारीलाई थप जिम्मेवार बनाउने अपेक्षा गरिएको छ। सूचनामा अनुरोध कार्यान्वयन गर्न सम्बन्धित सबैलाई आग्रह गरिएको छ। उक्त पत्रमा उपसचिव मनोज नेपाली सिम्खालको हस्ताक्षर रहेको छ।

यस निर्णयको चौतर्फी रूपमा तारिफ भइरहेको छ। शिक्षा क्षेत्रका जानकारहरूले यसलाई सकारात्मक कदमका रूपमा लिएका छन्। तर, निर्णयको प्रभावकारी कार्यान्वयन कत्तिको हुन्छ भन्ने विषय भने अझै प्रतीक्षाको विषय बनेको छ।