गोरखा — आँपपिपल अस्पतालको स्तरोन्नति तथा सेवा विस्तारका विषयमा महत्त्वपूर्ण छलफल भएको छ। सोमबार अस्पताल व्यवस्थापन समितिका अध्यक्ष पार्वती देवी पाठकको संयोजकत्वमा बसेको बैठकले अस्पतालको दीर्घकालीन विकासका लागि विस्तृत परियोजना प्रतिवेदन डिपिआर (DPR) तयार गर्ने निर्णय गरेको हो।

बैठकमा पालुङटार नगरपालिकाका वडा नं. १ देखि १० सम्मका वडा अध्यक्षहरूको उपस्थिति रहेको थियो। सहभागीहरूले अस्पतालको भौतिक पूर्वाधार सुदृढीकरण, सेवा सुविधाको विस्तार तथा गुणस्तरीय स्वास्थ्य सेवा प्रवाहका लागि डिपिआर अपरिहार्य रहेकोमा जोड दिएका थिए।

डिपिआर तयारीका लागि आवश्यक बजेट व्यवस्थापन गर्न स्थानीय तहसँग समन्वय गर्ने सहमति समेत बैठकले गरेको छ।

यसैबीच, अस्पतालबाट सञ्चालन हुँदै आएको बस सेवाको प्रभावकारिताबारे पनि समीक्षा गरिएको छ। सेवा अझ प्रभावकारी बनाउन रुट विस्तार गर्ने प्रस्तावमाथि छलफल भएको जनाइएको छ। आगामी दिनमा पालुङटार नगरपालिकाका सबै वडामा स्वास्थ्य सेवा पहुँच विस्तार गर्ने लक्ष्य लिइएको छ।

बैठकमा सहभागीहरूले अस्पतालको स्तरोन्नति र सेवा विस्तारले स्थानीय नागरिकलाई सहज, सुलभ र गुणस्तरीय स्वास्थ्य सेवा उपलब्ध गराउन मद्दत पुग्ने विश्वास व्यक्त गरेका छन्।