गोरखा — नेपाल विद्युत प्राधिकरण गोरखा वितरण केन्द्रले दुई दिनका लागि विद्युत सेवा अवरुद्ध हुने सूचना जारी गरेको छ।

वितरण केन्द्रका अनुसार पालुङटार सबस्टेशनबाट वितरित राधाकृष्ण फिडरअन्तर्गत च्याङ्ली, गाँईखुर र सेरा क्षेत्रमा मिति २०८३ वैशाख ५ र ६ गते बिहान १० बजेदेखि साँझ ५ बजेसम्म विद्युत आपूर्ति बन्द रहनेछ।

लाइन आसपासका रुखका हाँगा काट्ने तथा मर्मत/सुधार कार्य गर्नुपर्ने भएकाले उक्त अवधिभर विद्युत सेवा अवरुद्ध गर्न लागिएको हो।

वितरण केन्द्रले तोकिएको समयभन्दा अगावै काम सम्पन्न भएमा विद्युत सेवा पुनः सुचारु गरिने जनाएको छ। त्यस्तै, मौसम प्रतिकूल भई काम गर्न नसकिएमा विद्युत सेवा अवरुद्ध नहुने पनि सूचनामा उल्लेख छ।

यसबाट उपभोक्तामा पर्न जाने असुविधाप्रति वितरण केन्द्रले क्षमायाचना गरेको छ।