काठमाडौं: काठमाडौं महानगरपालिकाले आफ्नो क्षेत्राधिकारभित्रका सहकारी संस्थाहरूलाई सहकारी ऐन विपरीतका कार्य नगर्न कडा निर्देशन दिएको छ। पछिल्ला दिनमा बचतकर्ताको रकम असुरक्षित भएको गुनासो बढेपछि महानगरले नियमन कडाइ गरेको हो।

महानगरको सहकारी विभागले सूचना जारी गर्दै नियम उल्लंघन गर्ने संस्थामाथि कारबाही हुने चेतावनी दिएको छ। दर्ता नभएका संस्था सञ्चालन नगर्न, सदस्यको बचत निजी वा व्यवसायिक प्रयोजनमा प्रयोग नगर्न, बिना धितो कर्जा नदिन तथा सीमा भन्दा बढी ऋण नदिन स्पष्ट निर्देशन दिइएको छ।

त्यस्तै, सहकारीका सदस्य वा कर्मचारीले संस्थाको सम्पत्ति दुरुपयोग गर्ने, नातेदारलाई असुल नहुने ऋण दिने वा झूटा विवरण पेश गरेर ऋण लिने जस्ता कार्य गरेमा कानुनी कारबाही हुने महानगरले जनाएको छ।