गोरखा — आइतबार साँझ आएको असिना, पानीसहितको हावाहुरीले गोरखाको पालुङटार नगरपालिका क्षेत्रमा ठूलो क्षति पुर्‍याएको छ।

हावाहुरीका कारण पालुङटार–९ धुँवाकोट, मिरकोट र पौवाटारलगायत क्षेत्रका दर्जनभन्दा बढी घर तथा गोठका छाना उडाएको प्रहरीले जनाएको छ।

त्यसैगरी पालुङटार–९ स्थित त्रिवेणी माध्यमिक विद्यालयको प्रशासनिक भवनको छाना पनि हावाहुरीले उडाउँदा कम्प्युटरलगायत सामग्रीमा क्षति पुगेको शिक्षक भुवन सेडाइँले जानकारी दिए।

हावाहुरीपछि विद्यालय क्षेत्रसहित आसपासका स्थानमा क्षतिको यकिन विवरण संकलन भइरहेको छ। साथै, रुख ढल्दा गोरेटो बाटो अवरुद्ध भई आवतजावतमा समेत समस्या भएको स्थानीयले बताएका छन्।

छाना उड्दा घरभित्र राखिएको अन्नपात समेत भिजेर थप क्षति भएको स्थानीयको भनाइ छ।