काठमाडौं — टोखा नगरपालिकाले सार्वजनिक स्थानको व्यवस्थापन तथा शहरी सौन्दर्य कायम राख्ने उद्देश्यले फुटपाथमा गरिने व्यापार र अनाधिकृत पार्किङ हटाउन कडा निर्देशन जारी गरेको छ। नगरपालिकाले एक सूचना जारी गर्दै नगर क्षेत्रभित्रका मुख्य तथा सहायक सडकमा नियम उल्लङ्घन नगर्न स्पष्ट निर्देशन दिएको हो।

नगरपालिकाले आज एक सूचना जारी गर्दै सडकका दायाँ–बायाँ फुटपाथमा ठेलागाडा वा पसल राखेर व्यापार नगर्न, पसल वा सटर बाहिर सामान राखेर बिक्री नगर्न तथा अनाधिकृत रूपमा सवारी साधन पार्किङ नगर्न आग्रह गरिएको छ। साथै, सार्वजनिक स्थानमा निर्माण सामग्री जथाभावी रूपमा नथुपार्न समेत अनुरोध गरिएको छ।

नगरपालिकाका अनुसार यस्ता गतिविधिका कारण सर्वसाधारणलाई हिँडडुलमा असुविधा, सडक दुर्घटनाको जोखिम वृद्धि तथा शहरी सौन्दर्यमा नकारात्मक असर परेको पाइएकाले यो निर्णय गरिएको हो।

सूचनामा चेतावनी दिँदै नियमको अवज्ञा गरेमा नगरपालिकाको प्रचलित कानुनअनुसार आवश्यक कारबाही तथा जरिवाना गरिने प्रमुख प्रशासकीय अधिकृत कमल भट्टराईले जानकारी दिएका छन् ।