गोरखा । डिभिजन वन कार्यालय गोरखाले एकै दिन दुई वटा रतुवा मृगको उद्धार गरेको छ। गोरखा नगरपालिकाका दुई फरक स्थानबाट मृगहरूको उद्धार गरिएको कार्यालयले जनाएको छ।

कार्यालय प्रमुख मदन मोहन शाण्डिल्यका अनुसार एउटा मृग गोरखा बजारको प्रतिक्षालयचोकस्थित टिभिएस सोरुमबाट र अर्को छेबेटारस्थित स्थानीय गोकर्णबहादुर थापाको घरबाट उद्धार गरिएको हो। मंगलवार बिहान प्रतिक्षालयचोकमा मृग देखिएपछि स्थानीयले कार्यालयमा जानकारी गराएका थिए। त्यसलगत्तै खटिएको टोलीले मृगलाई सुरक्षित रूपमा उद्धार गरेको थियो।

त्यसै दिन साँझ छेबेटारमा अर्को मृग फेला परेपछि स्थानीयको सूचनाका आधारमा टोली पुगेर दोस्रो मृगको समेत उद्धार गरिएको कार्यालयले जनाएको छ। उद्धार गरिएका दुवै मृग करिब आठ महिनाका रहेको र उनीहरूलाई उपयुक्त वासस्थानमा लगेर छाडिएको जानकारी दिइएको छ।

कार्यालय प्रमुख शाण्डिल्यले हावाहुरीका कारण वन्यजन्तु तितरवितर भई बस्तीमा पस्ने गरेको बताए। यस्ता घटना विगतमा पनि दोहोरिने गरेको उल्लेख गर्दै कार्यालयले स्थानीयलाई वन्यजन्तु देखिएमा तुरुन्त जानकारी गराउन अनुरोध गरेको छ।