गोरखा । विश्वको आठौँ तथा नेपालको सातौँ अग्लो हिमाल मनास्लु हिमालमा मानव आरोहण सुरु भएको ७० वर्ष पूरा भएको छ । यस अवधिमा हालसम्म ३ हजार ६४३ आरोहीले सफल आरोहण गरेका पर्यटन विभागले जनाएको छ ।

सन् १९५६ मे ९ मा पहिलो पटक जापानी नागरिक तोसियो इमानिसी र भारतीय नागरिक ग्याल्जेन नोर्बु शेर्पाले ८,१६३ मिटर अग्लो मनास्लु हिमालमा सफल आरोहण गर्दै मानव पाइला राखेका थिए ।

त्यसपछि सन् १९७३ अप्रिल २२ मा पहिलो पटक नेपाली आरोही उर्केन छिरिङ शेर्पाले मनास्लु हिमालको सफल आरोहण गरेका थिए ।

मनास्लु आरोहणको ७० वर्ष पूरा भएको अवसरमा गोरखा र पोखरामा विशेष कार्यक्रम आयोजना गरिएको छ । नेपाल पर्वतारोहण संघ, मनास्लु संरक्षण क्षेत्र आयोजना र चुमनुब्री गाउँपालिकाको सहकार्यमा आयोजित कार्यक्रममा प्रथम आरोहीहरूको सम्मानसमेत गरिएको हो ।

कार्यक्रममा जापानी आरोही तोसियो इमानिसी र नेपाली आरोही उर्केन छिरिङ शेर्पाको सालिक अनावरण गरिएको थियो ।

सो अवसरमा गण्डकी प्रदेशका मुख्यमन्त्री सुरेन्द्रराज पाण्डे, चुमनुब्री गाउँपालिकाका अध्यक्ष निमा लामा लगायतले प्रथम आरोहीका परिवारका सदस्यहरूलाई सम्मान गरेका थिए ।

सम्मानित हुनेहरूमा तोसियो इमानिसीका छोरा कुनियो इमानिसी, नाति रसोयुके इमानिसी तथा उर्केन छिरिङ शेर्पाका छोरा छिरिङ शेर्पा रहेका छन् ।

त्यस्तै, चुमनुब्री–१ सामागाउँका प्रथम स्थानीय आरोही मिङ्मार छिरिङ लामा तथा अन्य आरोहीहरू नाङ्स्याल छेदेन र डिकी लामालाई पनि सम्मान गरिएको थियो ।

यसै अवसरमा पोखरामा आयोजित कार्यक्रममा मनास्लु हिमालको थ्रीडी फोटो सार्वजनिक गरिएको नेपाल पर्वतारोहण संघले जनाएको छ ।