गोरखा, — गोरखाको अजिरकोट गाउँपालिकालाई ‘पूर्ण खोप सुनिश्चितता तथा दिगोपना पालिका’ घोषणा गरिएको छ। गत शनिबार आयोजित एक विशेष कार्यक्रममा पालिकालाई औपचारिक रूपमा पूर्ण खोप सुनिश्चितता तथा दिगोपना पालिका घोषणा गरिएको हो।

गाउँपालिकाका जनस्वास्थ्य अधिकृत सुरेश दवाडीका अनुसार १६ देखि २३ महिनाभित्रका बालबालिकाले १५ महिनाभित्र अनिवार्य रूपमा लगाउनुपर्ने सबै खोप समयमै लगाएको तथा १५ महिनामुनिका बालबालिकाले पनि नियमित खोप सेवा लिएको सुनिश्चित भएपछि यो घोषणा गरिएको हो।

उनका अनुसार घरधुरी सर्वेक्षणमार्फत बालबालिकाहरूले खोप लगाएको अवस्था, छुट भएको वा नभएको विस्तृत रूपमा जाँच गरिएको थियो। “बालबालिकाले लगाउनुपर्ने सबै खोप लिएको पाइएपछि पालिकालाई पूर्ण खोप सुनिश्चितता घोषणा गरिएको हो,” दवाडीले बताए।

पालिकाभित्र रहेका पाँच वटै वडालाई यसअघि नै पूर्ण खोप वडा घोषणा गरिएसँगै समग्र अजिरकोट गाउँपालिकालाई पूर्ण खोप सुनिश्चितता तथा दिगोपना पालिका घोषणा गरिएको हो।

कार्यक्रममा जिल्ला खोप समन्वय समितिका अध्यक्ष तथा जिल्ला समन्वय समिति गोरखाका अध्यक्ष मोहनबहादुर थापाको उपस्थिति रहेको थियो।

स्वास्थ्य कार्यालयका अनुसार १६ महिनादेखि ५९ महिनासम्मका बालबालिकाले १५ महिनाभित्र लगाउनुपर्ने सबै खोप पाए नपाएको नियमित रूपमा अनुगमन गरिँदै आएको छ। छुटेका बालबालिकालाई पुनः खोप लगाउने व्यवस्था समेत गरिन्छ।

स्थानीय तहहरूले छुटेका बालबालिकाको पहिचान गरी खोप सेवा उपलब्ध गराएपछि सो विवरण जिल्ला हुँदै प्रदेश र संघीय तहमा पठाइन्छ। त्यसपछि सम्बन्धित निकायले ‘पूर्ण खोप सुनिश्चितता जिल्ला’ लगायतका घोषणा प्रक्रिया पूरा गर्ने गरिन्छ।