भरतपुर । जिल्ला प्रहरी कार्यालय चितवनको नेतृत्व प्रहरी उपरीक्षक (एसपी) रामेश्वर पौडेलले सम्हालेका छन् । बुधबार आयोजित कार्यक्रममा निवर्तमान प्रहरी प्रमुख एसपी गोविन्द पुरीले पौडेललाई औपचारिक रूपमा कमाण्ड हस्तान्तरण गरेका हुन् ।

यससँगै प्रहरी प्रधान कार्यालय नक्साल सरुवा भएका एसपी पुरीलाई बिदाइ गरिएको छ । कार्यक्रममा प्रहरी अधिकृत तथा कर्मचारीहरूले पुरीको कार्यकालको प्रशंसा गर्दै आगामी जिम्मेवारीका लागि शुभकामना व्यक्त गरेका थिए ।

एसपी पुरी चितवनमा रहँदा शान्ति सुरक्षा व्यवस्थापन, अपराध नियन्त्रण तथा प्रहरी–नागरिक सम्बन्ध सुधारमा सक्रिय भूमिका निर्वाह गरेको सहभागीहरूले बताएका थिए ।

नयाँ प्रहरी प्रमुखका रूपमा जिम्मेवारी सम्हालेका एसपी पौडेललाई कार्यक्रममा स्वागत गरिएको थियो । सहभागीहरूले उनको कार्यकाल सफल रहोस् भन्ने शुभकामना व्यक्त गरेका थिए ।

पदभार ग्रहणपछि एसपी पौडेलले जिल्लाको शान्ति सुरक्षा सुदृढ बनाउने, अपराध नियन्त्रणलाई प्रभावकारी बनाउने तथा नागरिकको जिउधनको सुरक्षालाई प्राथमिकतामा राखेर काम गर्ने प्रतिबद्धता व्यक्त गरे ।

उनले कार्यसम्पादन र नतिजाका आधारमा प्रहरी कर्मचारीको मूल्यांकन गरिने उल्लेख गर्दै संगठनभित्र व्यावसायिकता, अनुशासन र जिम्मेवारीलाई थप मजबुत बनाइने बताए ।

‘जनताले अनुभूति गर्ने गरी प्रभावकारी र नागरिकमैत्री प्रहरी सेवा प्रवाहमा केन्द्रित हुनेछौं,’ एसपी पौडेलले भने ।