काठमाडौं: जिल्ला प्रहरी परिसर काठमाडौंका प्रमुख एसएसपी रमेश थापा ९ महिनाको कार्यकाल पूरा गरेर बिदा भएका छन् । उहाँको स्थानमा सरुवा भएर आएका एसएसपी दिलिप घिमिरेले काठमाडौं प्रहरीको कमाण्ड सम्हाल्नुभएको छ ।

एसएसपी थापा जेनजी आन्दोलनपछि गत असोज ५ गते काठमाडौं प्रहरी प्रमुखका रूपमा सरुवा भएर आएका थिए । त्यतिबेला काठमाडौंको सुरक्षा अवस्था निकै चुनौतीपूर्ण बनेको थियो । जेनजी पक्ष र एमालेनिकट भातृ संगठनहरूबीच एकअर्काविरुद्ध उजुरी गर्ने, पक्राउका लागि दबाब दिने जस्ता गतिविधि बढेका थिए ।

त्यस्तो संवेदनशील अवस्थामा सुझबुझपूर्ण ढंगले निर्णय गर्दै परिस्थितिलाई नियन्त्रणमा राख्न थापाले महत्वपूर्ण भूमिका खेलेको सुरक्षा अधिकारीहरू बताउँछन् । जिम्मेवारी सम्हालेपछि कानुन कार्यान्वयन, नागरिकमा शान्ति सुरक्षाको अनुभूति गराउने, पीडितलाई न्यायको सुनिश्चितता गर्ने तथा प्रहरी–नागरिक सम्बन्धलाई थप सौहार्द बनाउन ‘हाम्रो प्रहरी’ अभियान अन्तर्गत विभिन्न काम गरिएको थापाको भनाइ छ ।

भदौमा भएको जेनजी आन्दोलनका क्रममा क्षति पुगेका प्रहरी संरचनाको मर्मत तथा पुनर्निर्माण गरेर नियमित काम कारबाहीलाई अघि बढाइएको थियो । बिग्रँदो सुरक्षा अवस्थालाई लयमा फर्काउन आफूले सक्दो प्रयास गरेको थापाको बुझाइ छ ।

उनको कार्यकालमा निर्वाचनको शान्ति सुरक्षा व्यवस्थापन, एनपीएल क्रिकेट प्रतियोगिताको सुरक्षा, फरार अभियुक्त पक्राउ, टीओबी समूहको पहिचान तथा कारबाही जस्ता महत्वपूर्ण कामहरू सम्पन्न भएका थिए ।

अब संघीय राजधानी काठमाडौंको शान्ति सुरक्षाको जिम्मेवारी एसएसपी दिलिप घिमिरेको काँधमा आएको छ । सुरक्षा दृष्टिकोणले अत्यन्त संवेदनशील मानिने काठमाडौंको कमाण्ड सम्हाल्नु नयाँ नेतृत्वका लागि चुनौतीपूर्ण जिम्मेवारीका रूपमा हेरिएको छ।

तस्बिरमा हेर्नुहोस्: