गोरखा । आरुघाट गाउँपालिकाले आर्थिक वर्ष २०८३/०८४ का लागि रु. ५९ करोड २६ लाख ५५ हजार ६ सय १७ बराबरको कुल अनुमानित बजेटसहित नीति तथा कार्यक्रम स्वीकृत गरेको छ।

गाउँसभाबाट स्वीकृत नीति तथा कार्यक्रम तथा बजेटले कृषि, पशुपालन, शिक्षा, स्वास्थ्य, पूर्वाधार विकास, रोजगार प्रवर्द्धन तथा स्थानीय आर्थिक विकासलाई प्राथमिकतामा राखेको छ। गाउँपालिकाले उपलब्ध स्रोत–साधनको प्रभावकारी परिचालनमार्फत नागरिकको जीवनस्तर सुधार र दिगो विकासलाई जोड दिएको जनाएको छ।

यसै अवसरमा गाउँपालिका भित्र कृषि तथा पशुपालन क्षेत्रलाई आफ्नो मुख्य पेशा बनाई समाजमा उदाहरणीय योगदान पुर्‍याउनुभएका कृषकहरूलाई उत्कृष्ट कृषक का रूपमा सम्मान गरिएको छ। सम्मानित कृषकहरूको योगदानले स्थानीय उत्पादन वृद्धि, कृषि व्यवसायीकरण तथा अन्य कृषकहरूलाई प्रेरणा प्रदान गरेको भन्दै गाउँपालिकाले कदर व्यक्त गरेको छ।

गाउँपालिकाले कृषि तथा पशुपालन क्षेत्रको विकास र किसानको आयआर्जन अभिवृद्धिका लागि आगामी दिनमा थप प्रभावकारी कार्यक्रम सञ्चालन गर्ने प्रतिबद्धता समेत जनाएको छ।