लमजुङ। बेसीशहर नगरपालिकाले राष्ट्रिय प्राकृतिक स्रोत तथा वित्त आयोगद्वारा गरिएको स्थानीय तह कार्यसम्पादन मूल्यांकनमा उत्कृष्ट नतिजा हासिल गरेको छ।

आर्थिक वर्ष २०८१/०८२ को मूल्यांकनअनुसार बेसीशहर नगरपालिकाले लमजुङ जिल्लामा प्रथम स्थान, गण्डकी प्रदेशमा तेस्रो स्थान तथा नेपालभर १६औँ स्थान हासिल गरेको हो। नगरपालिकाले कुल ७६.३० अंक प्राप्त गर्दै उल्लेखनीय प्रगति गरेको छ।

राष्ट्रिय प्राकृतिक स्रोत तथा वित्त आयोगले स्थानीय तहको सुशासन, वित्तीय अनुशासन, सेवा प्रवाह, योजना कार्यान्वयन तथा समग्र कार्यसम्पादनलाई आधार मानेर मूल्यांकन गरेको हो।

नगरपालिकाले प्राप्त उपलब्धिलाई निरन्तर सुधार, सुशासन र प्रभावकारी सेवा प्रवाहको परिणामका रूपमा लिँदै आगामी दिनमा अझ जिम्मेवार, पारदर्शी र नागरिकमैत्री सेवा प्रवाहलाई प्राथमिकता दिने जनाएको छ।

बेसीशहर नगरपालिकाले यो उपलब्धिले नगरको समग्र प्रशासनिक क्षमता, योजना कार्यान्वयन तथा विकास व्यवस्थापनमा थप ऊर्जा प्रदान गरेको उल्लेख गर्दै सेवा प्रवाहलाई अझ प्रभावकारी बनाउँदै लैजाने प्रतिबद्धता व्यक्त गरेको छ।