काठमाडौं । राष्ट्रपति रामचन्द्र पौडेलले युवाहरूलाई आवेगसँगै विवेक थप्न अझ मिहिनेत गर्न आग्रह गरेका छन् ।

बुधबार ललितपुरमा आयोजित अनलाइनखबरको ‘४० मुनिका ४०’ युवा सार्वजनिक कार्यक्रममा सम्बोधन गर्दै राष्ट्रपति पौडेलले हरेक पुस्ताले आफ्नो हिस्साको भविष्य निर्माण गर्ने भएकाले अब युवाहरूको पालो आएको बताएका हुन् ।

‘राष्ट्रको भविष्य कुनै एउटा भाषण, एउटा योजना वा एउटा पुस्ताले मात्र बनाउँदैन । हरेक पुस्ताले आफ्नो हिस्साको भविष्य निर्माण गर्छ । अब तपाईंहरूको पालो छ,’ उनले भने, ‘एउटै आग्रह–आवेगको धनी हुनुहुन्छ, यसमा विवेक थप्न अझ मिहिनेत गरौँ ।’

राष्ट्रपति पौडेलले अनलाइनखबरले गरेको सम्मानलाई युवाहरूले अर्को जिम्मेवारीको सुरुवातका रूपमा लिनुपर्ने बताए ।

‘आजको सम्मानलाई अर्को जिम्मेवारीको सुरुवात बनाउनुहोस् । आफू सफल हुनुहोस् । अरूलाई पनि अघि बढ्ने बाटो बनाइदिनुहोस् । आफ्नो सपना पूरा गर्नुहोस् । तर देशले देख्नुपर्ने ठूलो सपना पनि नबिर्सनुहोस्,’ उनले भने ।

देशमा कतिपय नकारात्मक परिसूचक देखिए पनि समाजमा क्रमशः परिवर्तनको भूमिका खेलिरहेका युवालाई उजागर गर्ने उद्देश्यले अनलाइनखबरले तीन वर्षअघिदेखि ‘४० मुनिका ४०’ सूची सार्वजनिक गर्दै आएको छ ।

यस वर्ष सार्वजनिक गरिएको सूची यसको तेस्रो संस्करण हो ।