भक्तपुर । नापजाँच सम्पन्न भएको करिब चार वर्षपछि भक्तपुरको मध्यपुरथिमि नगरपालिका–८ का ४२१ परिवारले जग्गाधनी पुर्जा (लालपुर्जा) पाएका छन् ।

भूमि समस्या समाधान समितिले साविक निलबाराही गाउँ विकास समिति वडा नं. २, ३, ४, ५, ६ र ७ अन्तर्गत पर्ने गाउँ ब्लक (स्ववासी) जग्गाको नापजाँच सम्पन्न भएको लामो समयपछि जग्गाधनी पुर्जा वितरण गरेको हो ।

उक्त क्षेत्रको नापजाँच आर्थिक वर्ष २०७८/७९ मा सम्पन्न भएको थियो । ‘बोदे गाउँ’का नामले परिचित यो क्षेत्र पुरानो नेवारी बस्तीका रूपमा रहेको छ ।

नापजाँच सम्पन्न भए पनि जग्गा दर्ताका लागि आवश्यक प्रक्रिया अघि बढाउन स्थानीयको सहभागिता न्यून हुँदा पुर्जा वितरणको काम लामो समय रोकिएको थियो । आयोगबाट नापनक्सा भइसकेका जग्गाको आवश्यक प्रक्रिया पूरा गरी अहिले ४२१ थान जग्गाधनी पुर्जा वितरण गरिएको हो ।

जग्गाधनी पुर्जा प्राप्त गरेसँगै लामो समयदेखि स्ववासीका रूपमा बसोबास गर्दै आएका ४२१ परिवारले आफ्नो जग्गाको औपचारिक कानुनी स्वामित्व प्राप्त गरेका छन् ।

लामो समयदेखि जग्गाको स्वामित्वसम्बन्धी कानुनी प्रमाणको पर्खाइमा रहेका स्थानीयले पुर्जा पाएसँगै जग्गाको कारोबार तथा अन्य कानुनी प्रक्रियामा सहजता हुने अपेक्षा गरिएको छ ।