२९ साउन, काठमाडौं । नेपाल आयल निगमले काठमाडौंमा खाना पकाउने एलपी ग्यासको सहज आपूर्ति तथा वितरणका लागि शनिबार विभिन्न पाँच स्थानबाट ग्यास सिलिन्डर बिक्री–वितरण गर्ने भएको छ ।

जिल्ला प्रशासन कार्यालय काठमाडौं र नेपाल आयल निगमको समन्वयमा २०८३ साउन ३० गते शनिबार विभिन्न ब्रान्डका ग्यास सिलिन्डर बिक्री गर्न लागिएको हो । निगमका अनुसार अत्यावश्यक परेका उपभोक्ताले बिहान १० बजेदेखि साँझ ६ बजेसम्म तोकिएका बिक्री केन्द्रबाट ग्यास खरिद गर्न सक्नेछन् ।

निगमको टेकुस्थित परिसरबाट नेपाल, एचपी, एभरेस्ट/सुगम, श्रीराम, सगर, सिद्धार्थ, श्री र हिमाल ब्रान्डका ग्यास बिक्री हुनेछन् ।

त्यस्तै, यातायात कार्यालय परिसर, चाबहिलबाट नेपाल र एचपी ब्रान्डका ग्यास बिक्री गरिनेछ ।

राधास्वामी, कीर्तिपुर परिसरबाट नेपाल, एचपी, एभरेस्ट/सुगम, श्रीमाया, श्रीकृष्ण, साइजवाला र ओम ब्रान्डका ग्यास उपलब्ध हुनेछन् । राधास्वामी, बसुन्धरा परिसरबाट नेपाल, एचपी, एभरेस्ट/सुगम, भानु र ओम ब्रान्डका ग्यास बिक्री गरिने निगमले जनाएको छ ।

यसैगरी पुरानो जिल्ला प्रशासन कार्यालय, बबरमहलबाट नेपाल, एचपी, एभरेस्ट/सुगम, श्रीराम, सगर, हिमाल, एसटीसी, लोकप्रिय र सूर्य ब्रान्डका ग्यास बिक्री हुनेछन् ।

ग्यास खरिद गर्न जाने उपभोक्ताले नागरिकता वा राष्ट्रिय परिचयपत्र अनिवार्य रूपमा साथमा लैजानुपर्नेछ ।

नेपाल आयल निगमले एलपी ग्यासको आयात नियमित भइरहेको तथा सम्बन्धित उद्योगहरूले आफ्ना विक्रेतामार्फत नियमित रूपमा ग्यास बिक्री–वितरण गरिरहेको जनाएको छ ।

निगमले अत्यावश्यक परेका उपभोक्तालाई मात्र ग्यास खरिद गर्न आग्रह गर्दै अनावश्यक रूपमा लाइनमा नबस्नसमेत अनुरोध गरेको छ । साथै, आपूर्ति व्यवस्थालाई सहज बनाउन उपभोक्ताले आवश्यकताअनुसार मात्र ग्यास खरिद गर्न निगमले आग्रह गरेको छ ।