काठमाडौं । काठमाडौंको कागेश्वरी मनोहरा नगरपालिका–१, गागलफेदीस्थित एक होमस्टेमा जुवा खेलिरहेको अवस्थामा प्रहरीले सञ्चालकसहित ३७ जनालाई पक्राउ गरेको छ । जिल्ला प्रहरी परिसर काठमाडौंका अनुसार स्थानीय कुमार लामाले सञ्चालन गरेको ‘कुशुम छ्याम्बा हाउस एन्ड होमस्टे’मा कौडा खेलिरहेको अवस्थामा उनीहरूलाई पक्राउ गरिएको हो ।

जुवातास खेल भइरहेको भन्ने गोप्य सूचनाका आधारमा प्रहरी वृत्त बौद्धबाट खटिएको टोलीले बिहीबार साँझ करिब ५ बजे होमस्टेमा छापा मारेको थियो । प्रहरीले घटनास्थलबाट ५ लाख ७८ हजार ५ सय ५५ रुपैयाँ नगद र १६ वटा कौडा बरामद गरेको जनाएको छ ।

पक्राउ परेका ३७ जनामध्ये होमस्टे सञ्चालक लामासहित ३० जना गागलफेदीकै स्थानीय बासिन्दा रहेको प्रहरीले जनाएको छ । जिल्ला प्रहरी परिसर काठमाडौंका प्रवक्ता एवं सूचना अधिकारी प्रहरी उपरीक्षक दानबहादुर थापाका अनुसार पक्राउ परेका सबैमाथि जुवासम्बन्धी कसुरमा अनुसन्धान भइरहेको छ । उनीहरूमाथि थप अनुसन्धानका लागि जिल्ला प्रशासन कार्यालयबाट पाँच दिनको म्याद थप अनुमति लिइएको प्रहरीले जनाएको छ ।