काठमाडौं । द्धन्द्ध पीडित तथा अपाङ्गता भएका बालबालिकाको हेरचाह, संरक्षण तथा स्वास्थ्य सेवामा सहयोग जुटाउने उद्देश्यले काठमाडौंको शंखरापुरमा श्रीमद्भागवत सप्ताह सत्संग ज्ञान महायज्ञ तथा आध्यात्मिक सांस्कृतिक उत्सव आयोजना हुने भएको छ ।

द्धन्द्ध पीडित तथा अपाङ्ग समाज नेपालको आयोजनामा तथा लायन्स क्लब अफ काठमाडौं हेरिटेज धरहरा र पिपल्स लाइफ केयर हस्पिटलको सहकार्यमा आगामी २०८३ मंसिर १० देखि १५ गतेसम्म महायज्ञ सञ्चालन हुन लागेको हो । शंखरापुर नगरपालिका–६, सलम्बुटारस्थित पिपल्स लाइफ केयर हस्पिटल नजिकै आयोजना हुने महायज्ञमा कथावाचिका योगमाया सखी (जेरी) ले श्रीमद्भागवत कथा वाचन गर्ने कार्यक्रम रहेको आयोजकले जनाएको छ ।

नेपाली लोकदोहोरी क्षेत्रमा परिचित नाम हो, बबिता बानियाँ ‘जेरी’ । लोकदोहोरी गायन तथा विभिन्न सांगीतिक प्रस्तुतिमार्फत लोकप्रियता कमाएकी जेरी पछिल्लो समय आध्यात्मिक यात्रामा समेत सक्रिय छिन् । करिब दुई दशक लोकदोहोरी क्षेत्रमा बिताएकी उनले गायनसँगै श्रीमद्भागवतको अध्ययनलाई अघि बढाएकी हुन् । उनले २०८१ माघमा काठमाडौंको नागार्जुन नगरपालिका–१, रानीवनस्थित नागभूषण महादेव मन्दिर परिसरमा आयोजित श्रीमद्भागवत महापुराण सप्ताह ज्ञान महायज्ञबाट औपचारिक रूपमा कथावाचन यात्रा सुरु गरेकी थिइन् । त्यसपछि उनी ‘योगमाया सखी’का रूपमा समेत परिचित भएकी छन् ।

आयोजकका अनुसार महायज्ञको मुख्य उद्देश्य द्धन्द्धपीडित तथा अपाङ्गता भएका बालबालिकाको उचित हेरचाह, संरक्षण, स्वास्थ्य उपचार तथा दैनिक जीवनयापनका आधारभूत आवश्यकता पूरा गर्न सहयोग जुटाउनु हो । धार्मिक तथा आध्यात्मिक कार्यक्रमलाई सामाजिक सेवासँग जोडेर आयोजना गर्न लागिएको महायज्ञमा सहभागी हुन आयोजकले श्रद्धालु भक्तजन तथा सर्वसाधारणलाई अनुरोध गरेको छ ।