नेपाली चलचित्र क्षेत्रमा नयाँ पुस्ताका प्रतिभाशाली कलाकारका रूपमा बिजय डंगोलको नाम तीव्र रूपमा चर्चामा आउन थालेको छ। चलचित्र ‘मन बिनाको धन’ मार्फत ठूलो पर्दामा डेब्यु गरेका उनले पहिलो चलचित्रमै दर्शकको मन जित्न सफल भएका छन्।

सजिलै मिल्ने ज्यान, आकर्षक अनुहार र स्वाभाविक तथा भावनात्मक अभिनय क्षमताका कारण बिजय छोटो समयमै दर्शकमाझ लोकप्रिय बन्दै गएका छन्। चलचित्रमा प्रस्तुत गरिएको उनको सरल तर गहिरो अभिनयले उनलाई दर्शक तथा समीक्षक दुवैको ध्यान तान्न सफल बनाएको छ।

विशेषगरी चलचित्र ‘मन बिनाको धन’मा कलाकार अशोक दर्जीलाई लड्डु खुवाउने दृश्य दर्शकका लागि अत्यन्तै भावुक र स्मरणीय बनेको छ। मानवीय संवेदना र आत्मीयता झल्किने उक्त दृश्य चलचित्रकै चर्चित दृश्यहरूमध्ये एक बनेको छ। यही दृश्यपछि बिजयप्रति दर्शकको माया झन् बढेको देखिन्छ। दर्शकको अत्यधिक चासोका कारण कतिपय स्थानमा उनलाई अलि सतर्क भएर हिँड्नुपर्ने अवस्था समेत आएको बताइन्छ।

म्युजिक भिडियोमार्फत अभिनय यात्राको सुरुवात गरेका बिजय डंगोल ठूलो पर्दासम्म आइपुग्दा आफूलाई मेहनती, अनुशासित र समर्पित कलाकारका रूपमा स्थापित गर्न सफल भएका छन्। निरन्तर अभ्यास, संघर्ष र अभिनयप्रतिको गहिरो लगावले नै आफूलाई यो स्थानसम्म पुर्‍याएको उनी बताउँछन्। हाल उनी आगामी नयाँ चलचित्रको तयारीमा जुटिरहेका छन्।

कान्तिपुर पाटीसँगको कुराकानीमा बिजय भन्छन्, “पहिलो चलचित्रबाटै दर्शकको यति धेरै माया पाउनु मेरो लागि ठूलो उपलब्धि हो। ‘मन बिनाको धन’ले मेरो जीवनको दिशा नै बदलिदियो। अबका दिनमा अझ जिम्मेवार र फरक–फरक भूमिकामा दर्शकमाझ प्रस्तुत हुन चाहन्छु।”

नेपाली चलचित्र क्षेत्रमा आशालाग्दा नयाँ अनुहारका रूपमा स्थापित हुँदै गरेका बिजय डंगोलको आगामी यात्राप्रति दर्शकमा ठूलो उत्सुकता देखिएको छ। उनले यही निरन्तरता, इमान्दारिता र मेहनत कायम राख्न सके नेपाली चलचित्र उद्योगमा उनको स्थान अझ मजबुत बन्दै जाने देखिन्छ।