काठमाडौं । दसैँ मनाउन काठमाडौं उपत्यका छाड्ने यात्रुको चाप बढेको छ। नयाँ बसपार्क, कलंकी, कोटेश्वर, बालाजु र बल्खुलगायत क्षेत्रमा गाउँ फर्किने यात्रुको चहलपहल बढेको हो।

बालबालिकासहित झिटिगुन्टा बोकेर घर फर्किनेहरूमा दसैँको उल्लास देखिन्छ। लामो र सकसपूर्ण यात्राको चिन्ता पनि उनीहरूमा उत्तिकै छ।

कोही गाडी रिजर्भ गरेर त कोही सार्वजनिक यातायातको टिकट काटेर घरको यात्रामा निस्किएका छन्। केही यात्रु भने गन्तव्यसम्म पुग्ने सवारीसाधनको खोजीमा छन्। बसपार्कमा टिकट काट्ने, गाडी चढ्ने र आफन्तसँग बिदाइ हुनेहरूको भीड देखिन्छ।

दसैँमा घर जाने यात्रुको चाप बढेसँगै सडक र बसपार्कमा भीडभाड बढेको छ। बसका सिट भरिभराउ छन् भने यात्रुले खचाखच भरिएका सवारीसाधन कलंकीलगायतका चोक पार गर्दै उपत्यकाबाहिरिइरहेका छन्।

यस वर्ष दसैँ कात्तिक ४ गते परेको छ। फूलपाती असोज ३१ गते भएकाले फूलपातीसम्म घर पुग्ने गरी धेरै यात्रु उपत्यका छाडिरहेका छन्। दसैँ नजिकिँदै जाँदा काठमाडौंका सडक, चोक र बसपार्कमा चाडपर्वको रौनकसँगै यात्राको व्यस्तता पनि बढेको छ।