काठमाडौं । नेपाली मौलिक गीत–संगीत तथा संस्कृतिको जगेर्ना र संरक्षण गर्ने उद्देश्यसहित सञ्चालन हुँदै आएको झम्के रोधी क्लबको चौथो वार्षिकोत्सव विविध सांगीतिक तथा सांस्कृतिक कार्यक्रमसहित भव्य रूपमा सम्पन्न भएको छ।

काठमाडौं महानगरपालिका–२६, मित्रनगरस्थित झम्के दोहोरी साँझले जेठ १३ देखि १७ गतेसम्म विभिन्न लोकदोहोरी कलाकारहरूको प्रस्तुति सहित वार्षिकोत्सव मनाएको हो।

कार्यक्रमको उद्घाटन राष्ट्रिय लोकदोहोरी व्यवसायी सङ्घका अध्यक्ष दीपसागर थापा मगरले गर्नुभएको थियो। उद्घाटन सत्रमा बोल्दै उहाँले नेपाली मौलिक कला, संस्कृति र लोकदोहोरीलाई संरक्षण तथा प्रवर्द्धन गर्न यस्ता कार्यक्रम महत्वपूर्ण हुने बताउनुभयो।

समापन समारोह नेपाल राष्ट्रिय लोक दोहोरी व्यवसायी संघका अध्यक्ष विनोद श्रेष्ठको प्रमुख आतिथ्यतामा सम्पन्न भएको हो। समापन कार्यक्रममा बोल्दै उहाँले लोकदोहोरी क्षेत्रलाई व्यावसायिक र मर्यादित बनाउन कलाकार, व्यवसायी र दर्शक सबैको साझा प्रयास आवश्यक रहेको बताउनुभयो।

झम्के दोहोरी साँझका सञ्चालक सुरेश भाटका अनुसार पाँच दिनसम्म सञ्चालन भएको वार्षिकोत्सवमा बसन्त थापा, कालिका रोका, सञ्जय गुरुङ, अस्मिता डल्लाकोटी, प्रकाश पराजुली, सुमन थापा, आशा बिसी, रिया खड्का, रति खड्का, पूर्णिमा सुनार, संगीता बडुवाल, किरण बिसी, सिद्धार्थ आले मगर, चेतन गोतामे तथा विवेक धिताल लगायत कलाकारहरूको प्रस्तुति रहेको थियो।

कार्यक्रममा नेपाली मौलिक कला, संस्कृति तथा गीत–संगीतलाई पारिवारिक वातावरणमा प्रस्तुत गरिएको र दर्शकहरूको बाक्लो उपस्थिति रहेको आयोजकले जनाएको छ। हाल झम्के दोहोरी साँझमा करिब ३० जना कलाकार आबद्ध रहेका छन्।

सञ्चालक सुरेश भाटका अनुसार यस्ता कार्यक्रमले लोकसंस्कृतिको संरक्षणसँगै कलाकारहरूलाई प्रोत्साहन दिने काम गरेको छ। तस्बिरमा हेर्नुहोस्: