चलचित्रको छायांकन शुक्रबारदेखि काठमाडौंको गागलफेदीस्थित फिल्म स्टुडियोबाट सुरु भएको छ । छायांकनअघि शुभमुहूर्त समारोह आयोजना गरी फिल्म युनिटले क्यामेरा तथा स्क्रिप्टको पूजा गरेको थियो ।

चलचित्रको छायांकन ३५ दिनसम्म चल्ने निर्माण पक्षले जनाएको छ । ओम प्रतीकको लेखन तथा निर्देशनमा बन्न लागेको चलचित्रमा पल शाह, अञ्जना मगर, शिशिर वाङ्देल, गजित विष्ट, लोकेन्द्र लेखक, अङ्कित खड्का, राज थापा, कर्मा लामा, सङ्गीता थापा, विशाल पुलामी र नारायणी खत्रीलगायत कलाकारको अभिनय रहनेछ ।

चलचित्रमा शान्न अधिकारी र मोनिका भण्डारी बाल कलाकारका रूपमा देखिनेछन् ।

नारायणीले सामाजिक सञ्जालमार्फत ‘यानीमाया’बाट आफूले फिल्मी यात्रा सुरु गर्न लागेको जानकारी दिएकी छन् । उनले आफ्नो सपना र यात्रामाथि विश्वास गर्दै चलचित्रमा अवसर दिएकोमा अभिनेता पल शाहप्रति आभार व्यक्त गरेकी छन् ।

साउन महिना आफ्नो जन्ममहिना भएकाले यही महिनाबाट नयाँ यात्राको सुरुवात गर्न पाउँदा यो समय आफ्नो जीवनमा विशेष र अविस्मरणीय बनेको नारायणीले उल्लेख गरेकी छन् । उनले आमाबुबालाई सम्झँदै आफ्नो नयाँ यात्राका लागि शुभेच्छा र आशीर्वादसमेत मागेकी छन् ।

‘यानीमाया’ सामाजिक प्रेमकथामा आधारित चलचित्र हुने निर्माण पक्षले जनाएको छ । चलचित्रमा चन्द्रज्योति आले र पल शाहको लगानी रहनेछ ।

चलचित्रको डीओपी नवराज उप्रेती, एक्सन कुमार महर्जन, मुख्य सहायक निर्देशन गिरिराज घिमिरे र सम्पादन भूपेन्द्र अधिकारीले गर्नेछन् ।

निर्माण पक्षले चलचित्रलाई फागुन ७ गतेदेखि प्रदर्शनमा ल्याउने घोषणा गरेको छ ।

लामो समयदेखि नेपाली सांगीतिक क्षेत्रमा सक्रिय नारायणीले विभिन्न म्युजिक भिडियो तथा दोहोरीमार्फत दर्शकमाझ आफ्नो पहिचान बनाउँदै आएकी छन् । अब ‘यानीमाया’मार्फत ठूलो पर्दामा उनको अभिनय यात्रा सुरु हुन लागेको हो ।