राष्ट्रिय लोक तथा दोहोरीगीत प्रतिष्ठान नेपालको ९औँ राष्ट्रिय महाधिवेशन तथा रजत जयन्ती पहिलोपटक मधेश प्रदेशमा आयोजना हुने भएको छ ।

प्रतिष्ठानले असोज २२, २३ र २४ गते महोत्तरीको बर्दिबासस्थित गौरीडाँडा खुला मञ्चमा महाधिवेशन गर्न लागेको हो । महाधिवेशनमा देशभरबाट करिब १ हजार ५ सय प्रतिनिधि तथा पर्यवेक्षक सहभागी हुने प्रतिष्ठानकी केन्द्रीय अध्यक्ष रिता थापा मगरले जानकारी दिइन् ।

शुक्रबार बर्दिबासमा आयोजित पत्रकार सम्मेलनमा अध्यक्ष मगरले प्रतिष्ठानको २५ वर्षे संस्थागत यात्राको महत्वपूर्ण अवसरका रूपमा यसपटक मधेशमा महाधिवेशन आयोजना गर्न लागिएको बताइन् ।

‘लोक संस्कृतिको संरक्षण, स्रष्टाको सम्मान, नवप्रतिभाको प्रोत्साहन’ भन्ने मूल नाराका साथ हुने महाधिवेशनले प्रतिष्ठानको नयाँ नेतृत्व चयन गर्नुका साथै संस्थाको विगतको समीक्षा र आगामी कार्यदिशाबारे निर्णय गर्नेछ ।

महाधिवेशनको उद्घाटन समारोहमा मधेश प्रदेशका मुख्यमन्त्री कृष्णप्रसाद यादव प्रमुख अतिथिका रूपमा सहभागी हुने प्रतिष्ठानले जनाएको छ । कार्यक्रममा प्रदेश तथा स्थानीय तहका जनप्रतिनिधि, अग्रज कलाकार, स्रष्टा, सञ्चारकर्मी तथा लोक संस्कृतिप्रेमीको सहभागिता रहनेछ ।

वि.सं. २०५७ असोजमा नवलपरासीको अरुणखोलामा वरिष्ठ लोक तथा दोहोरी गायक अम्बर विरही गुरुङको अध्यक्षतामा तदर्थ समिति गठन भएसँगै प्रतिष्ठानको संस्थागत यात्रा सुरु भएको थियो । हाल प्रतिष्ठान सातै प्रदेश, ७० जिल्ला तथा विदेशसम्म विस्तार भएको छ ।

रजत जयन्तीका अवसरमा लोक तथा दोहोरी गीत क्षेत्रमा योगदान पुर्‍याएका अग्रज स्रष्टा तथा विभिन्न क्षेत्रका व्यक्तित्वलाई सम्मान गर्ने कार्यक्रमसमेत रहेको अध्यक्ष मगरले बताइन् ।