गोरखा । बूढीगण्डकी नदीमा आएको विनाशकारी बाढीपहिरोका कारण अवरुद्ध विद्युत् तथा सञ्चार सेवा ३७ दिनपछि गोरखाको धार्चे गाउँपालिकाका बाढी प्रभावित बस्तीमा पुनः सञ्चालनमा आएको छ। धार्चे गाउँपालिका–१ र ३ का करिब ६ सय घरधुरीमा सोमबारदेखि विद्युत् सेवा सुचारु भएको हो।
गत असोज २५ गते आएको बाढीले चुमनुब्री गाउँपालिका–३ स्थित सिर्दिबास–उहिया लघुजलविद्युत् आयोजनामा क्षति पुर्याउँदा विद्युत् आपूर्ति बन्द भएको थियो। विद्युत् अवरुद्ध भएपछि उहियास्थित नेपाल टेलिकमको टावरसमेत बन्द हुँदा आसपासका बस्ती सञ्चार सम्पर्कबाट विच्छेद भएका थिए। कादुरी संस्थाको पहलमा क्षतिग्रस्त विद्युत् संरचनाको मर्मत तथा प्रतिस्थापन गरेपछि विद्युत् सेवा सञ्चालनमा आएको धार्चे गाउँपालिकाकी उपाध्यक्ष सुनिला गुरुङले जानकारी दिइन्।
विद्युत् सेवा सुचारु भएसँगै उहियाको टावरबाट माछाखोला, खोर्ला, खोर्लाबेंसी, दुङ्ला, रुन्चेत, उम्चेत र हुल्चुकलगायतका बस्तीमा सञ्चार सेवा पनि पुनः सञ्चालनमा आएको धार्चे–२ का वडाध्यक्ष सरोज गुरुङले बताए। लामो समयसम्म विद्युत् र सञ्चार सेवाबाट वञ्चित हुँदा स्थानीयको जनजीवन तथा सरकारी कामकाजसमेत प्रभावित भएको थियो। सेवा पुनः सञ्चालन भएपछि स्थानीयले राहत महसुस गरेका छन्। सेवा सञ्चालनका लागि सहयोग, पहल र समन्वय गरेको भन्दै उपाध्यक्ष गुरुङले डा. नारायण गुरुङसहित कादुरी संस्थाका सम्पूर्ण परिवारप्रति आभार व्यक्त गरेकी छन्।
-
तीन जिल्लाको भूगोल, इतिहास र मातृभूमिको प्रेम समेट्दै रामचन्द्र ढकालको ‘स्याङ्जाको बजार–२, म्हाँजु भञ्ज्याङ’ सार्वजनिक
-
धुम्बाराहीमा खुल्दै जिग्री सेकुवाको १०औँ आउटलेट, पहिलो १०० ग्राहकलाई विशेष अफर
-
रेडियोको माइक्रोफोनदेखि कमेडीको मञ्चसम्म : गोरखाका आशिष न्यौपानेको यात्रा
-
नेपाल कपडा तथा सिलाइ व्यवसायी महासंघको शुभकामना आदान–प्रदान तथा चियापान कार्यक्रम सम्पन्न
-
काग तिहारको एकाबिहानै कलाकार रमेश दुलालले दरबारमार्गमा यसरी बोलाए सयौँ काग