काठमाडौं । पूर्वप्रधानन्यायाधीश सुशीला कार्की प्रधानमन्त्री बन्ने पक्का भएको छ। राष्ट्रपति रामचन्द्र पौडेलको आह्वानमा शीतल निवासमा बसेको सर्वपक्षीय बैठकले सर्वसम्मत रूपमा कार्कीलाई प्रधानमन्त्री बनाउने निष्कर्ष निकालेको हो ।

बैठकमा सहभागी उच्चस्तरीय स्रोतका अनुसार “आवश्यकताको सिद्धान्त”अनुसार यो निर्णय गरिएको हो । राष्ट्रपति पौडेलले यसअघि प्रधानसेनापति अशोकराज सिग्देल, सभामुख देवराज घिमिरे, जेनजी प्रतिनिधि, संवैधानिक कानुनविद् र प्रमुख राजनीतिक दलका नेताहरूसँग बृहत् छलफल गरेका थिए ।

सोही छलफलमा कार्कीलाई प्रधानमन्त्री बनाउने सहमति जुटाइएको बताइएको छ। विश्वसनीय स्रोतका अनुसार भोलि बिहानसम्मै राष्ट्रपति पौडेलले सुशीला कार्कीलाई प्रधानमन्त्रीमा नियुक्त गरेर सपथ खुवाउने तयारी छ।

जेनजी प्रतिनिधिहरूले सुशीला कार्कीलाई अन्तरिम सरकारको नेतृत्व दिन निरन्तर दबाब र लबिङ गर्दै आएका थिए । यो निर्णयसँगै नेपालको राजनीति नयाँ चरणमा प्रवेश गरेको छ।