काठमाडौं — प्रतिनिधिसभाका ज्येष्ठ सदस्य अर्जुनरसिंह केसीले पद तथा गोपनीयताको शपथ लिएपछि सिंहदरबारस्थित संघीय संसद् सचिवालयमा कार्यभार सम्हालेका छन्।

राष्ट्रपति रामचन्द्र पौडेलबाट आजै शपथ लिएपछि केसीले संसद् सचिवालयमा औपचारिक रूपमा जिम्मेवारी सुरु गरेका हुन्। प्रतिनिधिसभा सदस्यको हालै सम्पन्न निर्वाचनपछि नयाँ सरकार गठन तथा संसद्को अधिवेशन आह्वानको तयारी भइरहेका बेला ज्येष्ठ सदस्यले सभामुखको हैसियतमा कार्यभार सम्हालेका हुन्।

संसद् सचिवालयका उच्च अधिकारीहरूले उनलाई स्वागत गरेका थिए। भोलि बिहीबार ज्येष्ठ सदस्य केसीले प्रतिनिधिसभाका नवनिर्वाचित २७४ जना सदस्यलाई शपथ गराउने कार्यक्रम रहेको छ। नयाँ सभामुख निर्वाचित नभएसम्म केसीले प्रतिनिधिसभा बैठकको अध्यक्षता गर्नेछन्।