गोरखा — पालुङटार नगरपालिकाले आगामी मेयरकप (9A साइड) फुटबल प्रतियोगिता आयोजना गर्ने भएको छ। नगरपालिकाको आ.व. २०८२/०८३ को स्वीकृत वार्षिक कार्यक्रमअनुसार प्रतियोगिता सञ्चालन गर्न लागिएको हो।

नगरपालिकाका अनुसार वडा नं. १ देखि १० सम्मका प्रत्येक वडाबाट एक–एक टिम सहभागी हुनेछन्। प्रतियोगिताका लागि टिम दर्ता २०८३ साल वैशाख २ गतेसम्म गर्न सकिने व्यवस्था गरिएको छ। दर्ताका क्रममा खेलाडीको फोटो, नागरिकता र सम्बन्धित वडा कार्यालयको सिफारिसपत्रसहित शिक्षा, युवा तथा खेलकुद शाखामा निवेदन दिनुपर्नेछ।

प्रतियोगिताको टाइ-सिट वैशाख ३ गते बिहान १० बजे सार्वजनिक गरिनेछ भने खेलहरू वैशाख ४ र ५ गते सञ्चालन गरिने छन्। खेलहरू माझाटार खेल मैदान, ठाटीपोखरीमा आयोजना गरिने जनाइएको छ।

पुरस्कारतर्फ प्रथम हुने टिमलाई नगद रु ६०,००० सहित ट्रफी, मेडल र प्रमाणपत्र प्रदान गरिनेछ भने द्वितीय हुने टिमलाई नगद रु ४०,००० सहित ट्रफी, मेडल र प्रमाणपत्र दिइनेछ।

यसका साथै प्रत्येक वडालाई टिम व्यवस्थापनका लागि रु १५,००० उपलब्ध गराइने नगरपालिकाले जनाएको छ। प्रत्येक टिममा १३ जना खेलाडी, १ जना प्रशिक्षक र १ जना व्यवस्थापकसहित कुल १५ जनाको टोली रहनेछ।

नगरपालिकाले यस प्रतियोगिताले युवाहरूलाई खेलकुदतर्फ आकर्षित गर्दै स्वस्थ, अनुशासित र सक्रिय समाज निर्माणमा टेवा पुग्ने विश्वास व्यक्त गरेको छ।