४ वैशाख, काठमाडौं । चन्द्रागिरि नगरपालिका–६ स्थित मातातीर्थमा दिवङ्गत आमाको सम्झनामा तर्पण, श्राद्ध तथा पूजा गर्ने श्रद्धालुहरूको बिहानैदेखि भीड लागेको छ ।

मातृदिवसका अवसरमा आमा नहुने व्यक्तिहरू आज बिहानैदेखि मातातीर्थ कुण्डमा स्नान गरी दिवङ्गत आमाको आत्मशान्तिको कामना गर्दै तर्पण, श्राद्ध तथा पूजाआजा गरिरहेका छन् । उक्त तीर्थस्थलमा हरिहर (विष्णु र शिव)को दर्शन तथा पूजा गर्ने परम्परा पनि रहेको छ ।

धार्मिक विश्वासअनुसार मातातीर्थ कुण्डमा स्नान तथा पूजापाठ गरेमा दिवङ्गत आमालाई शान्ति प्राप्त हुने मान्यता रहिआएको छ ।

सोही अवसरमा परिसरमा मूर्तिकार रामकृष्ण भण्डारीद्वारा निर्मित ‘साझा आमा’ नामक मूर्ति समेत स्थापना गरिएको छ । प्रत्येक वर्ष मातृदिवसका दिन आमा नहुनेहरू उक्त तीर्थमा पुगेर स्नान गर्ने, विभिन्न खाद्यपदार्थ चढाउने तथा श्रद्धाञ्जली अर्पण गर्दै मातृस्मृति मनाउने परम्परा रहेको छ ।