गोरखा — बाँदर लगायतका वन्यजन्तुले बालीनालीमा पुर्‍याउने क्षति रोक्न डिभिजन वन कार्यालय गोरखाले नियन्त्रणसम्बन्धी उपकरणको परीक्षण सुरु गरेको छ।

घामबाट सोलार प्यानलमार्फत चार्ज हुने १० केभी क्षमताको ‘सोलार फेन्स गार्ड’ नामक उक्त उपकरण पहिलो चरणमा वन कार्यालय नजिकै बाँदर आउने क्षेत्रमा परीक्षणका लागि जडान गरिएको छ।

उक्त उपकरणमार्फत ससाना तारहरू रूख तथा झाडीमा वन्यजन्तु हिँड्ने बाटोमा बाँधिएको छ, जसले वन्यजन्तुलाई रोक्ने अपेक्षा गरिएको छ।

डिभिजन वन कार्यालयले यस प्रविधिको सफल परीक्षणपछि बालीनाली संरक्षणमा यसको प्रभावकारी प्रयोग विस्तार गर्ने योजना रहेको जनाएको छ।