लमजुङ: लमजुङ जिल्लाको मर्स्याङ्दी गाउँपालिकामा आयोजित वडा स्तरीय अन्डर–१९ पुरुष तथा महिला फुटबल प्रतियोगितामा वडा नं. ४ ताघ्रिङले पुरुष तथा महिला दुवै विधामा लगातार दोस्रो वर्ष उपाधि जित्दै ह्याट्रिक सफलता हासिल गरेको छ।

मर्स्याङ्दी–७ ङादीस्थित खेलमैदानमा बुधबार सम्पन्न फाइनल खेलमा वडा नं. ४ ताघ्रिङले वडा नं. ५ घेर्मुलाई पुरुष तथा महिला दुवै समूहमा समान २–० गोल अन्तरले पराजित गर्दै उपाधिमाथि कब्जा जमाएको हो।

पुरुषतर्फ विजेता वडा नं. ४ ले नगद रु. १ लाखसहित कप, मेडल तथा प्रमाणपत्र प्राप्त गरेको छ भने उपविजेता वडा नं. ५ ले नगद रु. ७५ हजार प्राप्त गरेको छ। महिलातर्फ विजेता वडा नं. ४ ले नगद रु. ४० हजार तथा उपविजेता वडा नं. ५ ले नगद रु. २५ हजारसहित पुरस्कार प्राप्त गरेका छन्।

प्रतियोगितामा पुरुषतर्फ निशान गुरुङ तथा महिलातर्फ सरिता गुरुङ उत्कृष्ट खेलाडी घोषित भए। पुरुषतर्फ बीपिन तामाङ (४ गोल) र महिलातर्फ निष्मा गुरुङ (३ गोल) सर्वाधिक गोलकर्ता बने। त्यसैगरी पुरुषतर्फ निकास बिक तथा महिलातर्फ रोजिना गुरुङ उत्कृष्ट गोलरक्षक घोषित भए।

वैशाख २७ गतेदेखि सञ्चालन भएको उक्त प्रतियोगिता युवा तथा खेलकुद विकास समिति मर्स्याङ्दी गाउँपालिकाको आयोजनामा सम्पन्न भएको हो। कार्यक्रमका अवसरमा गाउँपालिका अध्यक्ष अर्जुन गुरुङलगायतका जनप्रतिनिधि तथा स्थानीय व्यक्तित्वहरूले विजेता एवं उपविजेता टोलीलाई पुरस्कार वितरण गरेका थिए।