गोरखा — राष्ट्रिय स्वतन्त्र पार्टी (रास्वपा) ले गोरखा जिल्लामा वडा, पालिका तथा जिल्ला तहका संगठनात्मक भेला र अधिवेशनलाई समन्वय तथा सहजीकरण गर्न केन्द्रीय प्रतिनिधि खटाएको छ।

पार्टीले केन्द्रीय सदस्य, सांसद तथा विभागीय पदाधिकारीहरूलाई जिल्लागत जिम्मेवारी तोकेको हो। सो अनुसार संगठन विस्तार, आन्तरिक संरचना व्यवस्थापन तथा अधिवेशन सञ्चालनलाई प्रभावकारी बनाउन जिम्मेवारी बाँडफाँट गरिएको रास्वपाले जनाएको छ।

जिम्मेवारी पाउनेहरूमा सांसद सुधन गुरुङ, महामन्त्री तथा सांसद कविन्द्र बुर्लाकोटी, सांसद एलिजा गुरुङ, सांसद सोभा खनाल, केन्द्रीय विभागका ध्रुवप्रसाद दाहाल र कृष्ण थापा तथा संघीय नेतृत्व मञ्चका हरिशरण आचार्य रहेका छन्।

पार्टीका अनुसार यो व्यवस्था स्थानीयदेखि जिल्ला तहसम्मको संगठन सुदृढीकरणका लागि गरिएको हो।