काठमाडौं । अर्थमन्त्री डा. स्वर्णिम वाग्लेले करदाता प्रोत्साहन पुरस्कारअन्तर्गत साउन महिनाको पहिलो पाक्षिकका बम्पर उपहार विजेता हेमराज जोशी र एक लाख रुपैयाँका विजेता हिमाल अर्याललाई पुरस्कार रकम हस्तान्तरण गरेका छन्।
सोमबार अर्थ मन्त्रालयमा आयोजित साउन महिनाको दोस्रो पाक्षिक करदाता प्रोत्साहन पुरस्कार घोषणा कार्यक्रममा अर्थमन्त्री वाग्लेले दुवै विजेतालाई पुरस्कार रकम हस्तान्तरण गरेका हुन्।
साउन महिनाको पहिलो पाक्षिकअन्तर्गत धनगढीका हेमराज जोशीले १० लाख रुपैयाँको बम्पर उपहार जितेका थिए। उनले २५० रुपैयाँमा विद्युतीय बल्ब खरिद गर्दा प्राप्त बिलमार्फत उक्त बम्पर पुरस्कार हात पारेका हुन्।
अर्थमन्त्री वाग्लेले जोशीलाई १० लाख रुपैयाँको चेक हस्तान्तरण गर्दै सरकारको करदाता प्रोत्साहन कार्यक्रमको ‘दूत’ बन्न आग्रह गरे। उनले कर तिर्ने संस्कृतिको विकासका लागि ‘बिल दिनुपर्छ र लिनुपर्छ’ भन्ने सन्देश समाजमा फैलाउनसमेत आग्रह गरे।
“हेमराजजी, बधाई छ। तपाईं पहिलो बम्पर उपहार विजेता हुनुहुन्छ। तपाईं सरकारको यो कार्यक्रमको दूत बन्नुहोस्, सरकारले अघि बढाएको ‘बिल दिनुपर्छ र लिनुपर्छ’ भन्ने कुरा समाजमा फैलाउनुहोस्,” अर्थमन्त्री वाग्लेले भने।
यसैगरी, नवलपरासीको गैँडाकोटका हिमाल अर्यालले १ लाख ३३ हजार ३३४ रुपैयाँको पुरस्कार जितेका छन्। साथीहरूसँग आइसक्रिम खाँदा गरेको कारोबारको बिलमार्फत उनले उक्त पुरस्कार जितेका हुन्। पुरस्कार रकमबाट २५ प्रतिशत कर कट्टी भएपछि अर्यालले १ लाख रुपैयाँ नगद प्राप्त गरेका छन्।
विभागका अनुसार साउन महिनाको पहिलो पाक्षिकका अन्य विजेतालाई पनि यसै साता सम्बन्धित आन्तरिक राजस्व कार्यालयमार्फत नगद पुरस्कार प्रदान गरिनेछ।
सरकारले करदाता प्रोत्साहन कार्यक्रममार्फत उपभोक्तालाई प्रत्येक कारोबारमा बिल लिन र व्यवसायीलाई अनिवार्य रूपमा बिल जारी गर्न प्रोत्साहित गर्दै कर प्रणालीलाई थप पारदर्शी र प्रभावकारी बनाउने उद्देश्य लिएको छ।
-
तीन जिल्लाको भूगोल, इतिहास र मातृभूमिको प्रेम समेट्दै रामचन्द्र ढकालको ‘स्याङ्जाको बजार–२, म्हाँजु भञ्ज्याङ’ सार्वजनिक
-
धुम्बाराहीमा खुल्दै जिग्री सेकुवाको १०औँ आउटलेट, पहिलो १०० ग्राहकलाई विशेष अफर
-
रेडियोको माइक्रोफोनदेखि कमेडीको मञ्चसम्म : गोरखाका आशिष न्यौपानेको यात्रा
-
नेपाल कपडा तथा सिलाइ व्यवसायी महासंघको शुभकामना आदान–प्रदान तथा चियापान कार्यक्रम सम्पन्न
-
काग तिहारको एकाबिहानै कलाकार रमेश दुलालले दरबारमार्गमा यसरी बोलाए सयौँ काग