काठमाडौं — काठमाडौं महानगरपालिकाले नयाँ शैक्षिक सत्रसँगै विद्यालयहरूमा पठनपाठन वैशाख १५ गतेबाटै सुरु गर्ने निर्णय गरेको छ।

संघीय सरकारले वैशाख २१ गतेबाट मात्र पठनपाठन सुरु गर्ने निर्णय गरे पनि महानगरले उक्त निर्णय कार्यान्वयन नगर्ने संकेत गरेको हो। महानगरको शिक्षा विभागले सूचना जारी गर्दै वैशाख १५ गतेदेखि नै शैक्षिक सत्र सञ्चालनमा ल्याउन विद्यालय तथा सरोकारवालालाई निर्देशन दिएको छ।

महानगरका अनुसार सरकारको निर्देशन, काठमाडौं उपत्यकाका मेयरहरूको अनुरोध, शिक्षक–कर्मचारी तथा विद्यार्थीमा परेको प्रभाव र विद्यालय व्यवस्थापन समितिहरूको सुझावलाई मध्यनजर गर्दै यस्तो निर्णय गरिएको हो।

संघीय सरकारले भने वैशाख १५ गतेबाट नयाँ शैक्षिक सत्र सुरु गर्ने र वैशाख २१ गतेबाट मात्र पठनपाठन सञ्चालन गर्ने निर्णय गर्दै स्थानीय तहहरूलाई पत्राचार गरेको थियो।