काठमाडौं । नेपाली कांग्रेसका सभापति गगन थापाले पार्टीका पूर्वसभापति एवं पूर्वप्रधानमन्त्री शेरबहादुर देउवालाई स्वदेश फर्किएकोमा स्वागत गरेका छन् ।

कांग्रेस केन्द्रीय समिति बैठकको सुरुआत गर्दै सभापति थापाले देउवालाई स्वास्थ्यलाभको कामनासहित स्वागत गरेका हुन् ।

बैठकमा थापाले भने, ‘निवर्तमान सभापति तथा पूर्वप्रधानमन्त्री शेरबहादुर देउवालाई स्वास्थ्य लाभको कामनासहित स्वदेशमा हार्दिक स्वागत गर्दछु ।’

करिब साढे पाँच महिनाको विदेश बसाइपछि देउवा बिहीबार स्वदेश फर्किएका हुन् । काठमाडौं ओर्लिएलगत्तै उनले विशेष वक्तव्य जारी गर्दै पार्टीभित्र एकता कायम गर्न आह्वान गरेका थिए ।

देउवाले पार्टीमा देखिएको असहमति र निराशालाई तत्काल समाधान गर्नुपर्नेमा जोड दिएका छन् । उनले पार्टीलाई एकताबद्ध बनाएर अघि बढ्नुपर्ने आवश्यकता औँल्याएका छन् ।

देउवाको स्वदेश फिर्तीपछि कांग्रेसको केन्द्रीय समिति बैठकमा समेत उनको स्वागत गर्दै पार्टीभित्रको एकता र सहकार्यलाई प्राथमिकता दिने सन्देश सभापति थापाले दिएका छन् ।