काठमाडौं । नेपाली कांग्रेसका पूर्वसभापति शेरबहादुर देउवाले पार्टीको आधिकारिकता विवादमा सर्वोच्च अदालतबाट आफूहरूले न्याय पाउनेमा पूर्ण विश्वस्त रहेको बताउनुभएको छ ।

शुक्रबारदेखि सुरु भएको कांग्रेसको संस्थापनइतर पक्षको राष्ट्रिय भेलालाई सम्बोधन गर्दै देउवाले पार्टीभित्र पछिल्लो समय विवाद बढेको भन्दै विशेष महाधिवेशनका नाममा विधि, विधान र पद्धति मिच्ने काम भएको आरोप लगाउनुभयो ।

‘लामो इतिहास बोकेको नेपाली कांग्रेस पार्टीभित्र अहिले चरम विवाद बढेको छ । विशेष महाधिवेशनको नाममा पार्टीलाई कमजोर बनाउने गरी विधि, विधान र पद्धति मिच्ने काम भएको छ,’ देउवाले भन्नुभयो ।

पार्टीको आधिकारिकतासम्बन्धी विषय सर्वोच्च अदालतमा पुनरावलोकनको अवस्थामा रहेकाले यसबारे थप टिप्पणी गर्न नचाहेको उहाँले बताउनुभयो ।

‘यो विषय सर्वोच्च अदालतबाट पुनरावलोकनको अवस्थामा रहेकाले थप टिप्पणी गर्न चाहन्नँ । तर सर्वोच्च अदालतबाट हामीलाई न्याय हुने कुरामा म पूर्ण विश्वस्त छु,’ देउवाले भन्नुभयो ।

देउवाले पार्टीभित्र देखिएको विवाद समाधान गर्दै नेपाली कांग्रेसको एकता र लोकतान्त्रिक पद्धतिलाई बलियो बनाउनुपर्नेमा समेत जोड दिनुभएको छ ।